'Walitî seba cigêrayîşê polîsan destûr nêda' 

2020-11-28 15:37:48


	 

	Şehriban Aslan

	 

	AMED - Derheqê polîsê ke şîdet û muameleyê nêbaş yê hemverê Dayîkê Aştîyê ke seba şermezarkerdişê tecrîd û paştdayîşê grevê vêşanî çalakî kerdibî, bi sebebê "Delîlê merdim pê bawer bibo, nêame bidestkerden" qerarê beratî ame dayene.

	 

	Seba şermezarkerdişê tecrîda serê Rayberê PKKyî Abdullah Ocalanî tepişteyê sîyasî û sîyasetmedaran 2018-2019 de dest bi grevê vêşanî yê bêdem û bêdor kerd. Seba paştdayîşê kesê ke grevê vêşanîye de yê herême û welat de çalakî ameyî viraştene. Demê eşkerayîye de polîsan dabi Dayîkê Aştî ro û muameleyê nêbaş înan rê kerdib. Nê ser o, Merkezê Heqê Cinîyan ê Baroyê Amedî, Komeleya Huqûqnasê Azad (OHD), Şubeyê Komeleya Heqê Merdiman (ÎHD) yê Amedî muracatê sucî Serdozgerîya Komara ya Amedî kerdib. Avûkatan ra Hatice Demira ke sucdarî kerdebî, dîyar kerd ke derheqê cigêrayîşî de tu averşîyayîş çin o û na babete ser o qerarê bêtaqîbkerdişî ameyo dayene.

	 

	'Muameleyê nêbaş Dayîkê Aştîye rê ame kerdene' 

	 

	Hatîce ard vîr ke gulana 2019 de grevê vêşanî peynî bîyo û va: "Seba ke dewlete derheqê grevê vêşanî de gamê çareserî nêeştêne, Dayîkê Aştîye seba waştişê xo bîyarê ziwan, eşkerayî dayî. Labelê Dayîkê Aştîye rastê muameleyê nêbaş ameyî û îşkence bi înan ame kerdene. No çî vernîya kamerayan de ame kerdene. Ma 5ê Gulana 2019 de waştiş kerd ke nê polîsî bêrê cezakerdene. Ma muracatê sucî bi rêxistinê şarî yê Amedî kerd."

	 

	'Walîtî destûr nêda cigêrayîşê polîsan'

	 

	Hatîce dîyar kerd ke înan serê nameyê Hayrîye Turkekul, Yaşar Akboga û Rabîa Ataş muracatê sucî kerdê û va: "Muracatî ser o tu averşîyayîş dosya de nêvirazîya. Pêwa raporê kuyayîşê Dayîkê Aştîye zî ma dir bî, labelê averşîyayîşêk nêvirazîya. Walîtîya Amedî destûrê cigêrayîşî serê polîsan nêda. Seke sebeb zî ame vatene ke polîsan çarçewaya wezîfeyê seba înan ameyo dayene têgeyrayê. Coka zî walîtî dîyar kerd ke lazimî seba cigêrayîşî derheqê polîsan de çin o."

	 

	'Sucê hemverê kurdan bêceza manenê'

	 

	Hatîce dîyar kerd ke înan sey Merkezê Heqê Cinîyan ê Baroyê Amedî, Komeleya Huqûqnasê Azad (OHD), Şubeyê Komeleya Heqê Merdiman (ÎHD) yê Amedî muracatê sucî kerdê û va: "Ma do nê berê AYM zî. Gama ke ma pratîkê hukmî vînenê, sucê hemverê kurdan bêceza manenê. Îhlalkerdişê heqan, tecawuz, muameleyo nêbaş yê hemverê welatijê kurdî bêceza manenê. Înan ra yew zî nimûneyê  Kemal Kurkutî yo. Pêwa delîlê fotografanê Abdurahman Gok anto, estê zî polîs ame beratkerdene."

	 

	'Ma do reyna zî her hawa têkoşînê xo yê huqûqî dewam bikerê'

	 

	Hatîce ar dvîr ke Adara 2016 de fîşegê gazî serê Enes Atayo 8 serrî kewt û dinyaya xo bedilna û va: "Sewîyeya muhakame de fîşegê gazî  ke bî sebebê merdişê Enesî buroyê emanetî de ameyê vinîkerdene. Enes gama ke dinyaya xo bedilna, cilê serê ey hetê wezîfedarê kolukî ra ameyî îmhakerdene. Telefon û telsizê aidî polîsê versucî ameyî îmhakerdene. Coka derheqê polîsê sucdaran de qerarê beratî ame dayene. Na dosya zî dewamê nê dosyan a. Gama ke mesela bena heq, azadî û têduştî şarê kurdî o wext pratîkê muhakemeyî nêvînenê. Labelê ma reyna zî her tewir têkoşînê xo yê huqûqî bidê."