‘Bexda û Hewlêr goreyê berjewendîyê xo nêzdîyê Şengalî benê’ 2020-11-27 11:56:38   Rojda Seyidxan   QAMIŞLO - Hemsereka Kantonê Qamişloyî Perwîn Yûsif derheqê kerdiş û planê Hukmatê Bexdayî û Hewlerî ke serê Şengalî de kenê wina va: "Pêkerdiş mabêne hukmatê Bexda û Hewlerî de ameyo kerdene, teberê îradeyê welatîyê Şengalijan o û no zî teberê qanûnî yo.”   9ê teşrîna verêne de hukmatê Bexdayî û Hewlerî pêkerdişê ke leşkerê Iraqî derbazê Şengalî bibê îmza kerd. Sewbîna 23 teşrîna peyêne de no qerar ame bi caardene û 10 hezar leşkerê Iraqî derbazê Şengalî kerdî. Hemverê nê pêkerdiş û qeraran pêro kurdî çalakîyan de yê. Derheqê babete de Hemsereka Kantonê Qamişloyî Perwîn Yûsif ercnayîş kerd.   ‘Ganî waştişê şarî bêro goşdarîkerdene’   Perwîne qalê pêkerdişî kerd û va: "Yê ke qerarê derheqê Şengalî de bidê, Şengalijî bi xo yê. Seba ke hemverê pêro hêrişan û fermanan xo ver dayê û xoserîyê xo bi xo awan kerdê. Pêkerdişê ke mabêne hukmatê Bexda û Hewlerî de amebi îmzakerdene, teberê îradeyê Şengalijan o û no pêkerdiş bi xo zî hemverê heqî yo û qanûnî nîyo. Nêeşkenê Şengal bipawê, seba demo ke çeteyê DAIŞî hêrişê Şengalî kerdî, pêro pêşmergeyî Şengal ra remayî. Eke çareserîyêk lazim bibo ganî waştişê Şengalijan zî bêro goşdarîkerdene.”   ‘Wazenê reyke bîn zî ferman reyna bikerê’   Perwîne dewam de wina va: "Wexto ke 2014 de çeteyê DAIŞî hêrişê Şengalî kerdî, bi hezaran kurdê êzîdî ameyî qetilkerdiş, koçberkerdiş û cinîyê înan ameyî remnayene. O wext de zî leşkerên Iraqî û PDK seba pawitişê kurdê êzîdî uca de bî, labelê senîn çeteyan hûriş kerd, heme remayî û welatijê Şengalî nêpawitî. Nika zî qerar girewtê ke reyna ageyrê Şengal. La welatijê Şengalijî zî nê çî qebul nêkenê. Nika hukmatê Bexdayî û Hewlerî seba berjewendîyê xo nêzdîyê Şengalî benê. Lazim o Şengalijî xo bi xo rayîra berê û rêxistinbîyayîşê xo bipawê ke reyke bîn ferman nêro serêyê înan.”   ‘Ganî ma nê planan veng vejê’   Perwîne tewr peyîn veng da ke Şengalijî hemverê qerar û planê lêşinan rêxistinbîyayîşê xo bipawê û wina qedêna: “Seba ke ma bieşkê planê ke serê Şengalî de yenê kerdene veng vejê, ganî ma xo bi rêxistin bikerê. Sewbîna ganî welatijê yê Şengalî wayîrê îdarekarîyê xo yê xoser vejîyê, sazgeh û rêxistinbîyayîşê xo xurt bikerê.”