‘Cayê ke ameyê îşxalkerdene cinî hedef yenê girewtene’ 2020-11-25 14:50:12   Sara Şêx Hesen   HELEB - Endama Meclîsê Sûrîye Demokratîke Evîn Sîdo derheqê hêriş û herême îşxalkerdene de qisey kerd û va: "Herêmê îşxalkerdene de sucê hemverê merdimayî de yenê kerdene û çete herême îşxalkerdene de bîyayîş û îradeyê cinîyan hedef gênê. Ma veng Rêxistinê Heqê Merdiman kenê ke çimê xo hemverê kerdişan akerê û wezîfeyê xo bi ca bîyarê.”   Herêmê Efrîn, Serêkanî û Girê Spî hetê dewleta tirk û hemkaranê ci ra ameyî îşxalkerdene. Ê herêman de her roj sûcê merdimayî yenê kerdene. Sewbîna nê herêman de merdimî her roje bi îşkence, qetlîam û kuştiş û remnayîşî dir rî bi rî manenê. Heto bîn ra bi her hawayî demografî herême yenê vurnayene. Derheqê babete de Endama Meclîsê Sûrîyeya Demokratîk (MSD) Evîn Sîdo ercnayîş kerd.   ‘Herêmê îşxalkerdene de sucê şerî yenê kerdene’   Evîne destpêkê qiseykerdişê xo de qalê serebûtan kerd û va: "Roja ke dewleta tirkî herêma Efrîn, Serêkanî û Girê Spî de îşxalkerdişî bi hawayêk rojane yenê meydan. Nê îhlalkerdişan de sey kiştiş, tecawuz û remnayîşê cinîyan, remnayîşê sivîlan, vurnayîşê demografî û koçberkerdişê şarî yê. Verê çimê temamê dinya de nê kerdişî benê û heme dinya nê kerdişan rê bêveng ê. Sivîlê ke nê heriman de ciwîyenê nêeşkenê biciwîyê, cinî her wext bi ters, şîdet, zulm û zordarî dir rî bi rî manenê.”   ‘Amancê dewleta tirkî şiknayîşê erjê cinîyan o’   Evîne bale ant serê hedefgirewtişê cinîyan cayê îşxalkerdene de û va: "Cinîyê ke herêma îşxalkerdene de her roje rastî kiştiş, tecawuz û kerdişê merdimayî rî bi rî manenê. Efrîn de domanêke qij bi nameyê Nebîhe Mihemed Cuma û keyeyê aye seba ke reaksîyon hemverê kerdişê dewleta tirkî û çeteyê ci ramojna, a domane ameye remnayene, dima ra ameye qetîlkerdene û cenazeya aye eştî Ezaz. Bi hezaran hedîseyê wina ameyî meydan. Zîndanê Efrînî de xeylêk cinî ameyî tepiştene û bi hezaran cinî zî qedere înan dîyar nîya. Amancê dewleta tirkî û çeteyê girêdayî aye şiknayîşê îradeyê cinîyan o.”   ‘Ganî heqê merdiman wezîfeyê xo bi ca bîyarê’    Evîne tewr peyîn veng da sazgehê heqê merdiman û va: “Ma veng danê Rêxistinê Heqê Merdiman ke çimê xo hemverê kerdiş û îhlalkerdişê dewleta tirkî de padayê, abikerê û wezîfeyê xo bi ca bîyarê. Sewbîna ganî dewleta tirkî û çeteyê ci bêrê cezakerdene.”