Dayîka Pinare Şefîka: Ne dewlete û ne zî camêrd pawenê wa cinî xo bipawê 

2020-11-24 15:32:21


	 

	BEDLÎS - Dayîka Pinar Gultekîna ke hetê Metîn Avci ra ameye qetilkerdene Şefîka Gultekîn, dîyar kerd ke îqtîdar pawitişê heqê cinîyan ceza keno, versucan paweno û ganî cinî heqê xo bipawê.

	 

	Şîdetê serê cinîyan problemo tewr pîl yê Tirkîya yo. Hema vajê her roje cinîyêk yena qetilkerdene. Polîtîkayê bêcezayî ke yenê aveşîyayîş benê sebebê ke cinî tewr zêde bêrê qetilkerdene. Cinîyê ke heme wareyê cinîyan de yê û hewl danê heqanê xo bipawê zî yenê destbendkerdene û  tepiştene. Sewbîna seba heqê cinîyan asteng bikerê Tirkîya de xoantişê Pêkerdişê Stenbolî zî rojeve de yo.

	 

	Nêzdîbîyayîşê 25ê teşrîna peyêne Roja Têkoşînê Hemverê Şîdetî Cinîyan dir ma dayîka Pinar Gultekîn ya ke hetê Cemal Metîn Avci ra 21ê temmuze de qezaya Ula ya Muglayî de ameye qetilkerdene de qisey kerde. Şefîka va, "Dimayê Pinare bi desan cinî ameyî qetilkerdene. Eke dewlete, kiştoxan muhakeme bikerdêne ewro hende cinî nêameyîne qetilkerdene. Eke ewro edalet bibayîne ganî camêrdo ke kênaya mi qetil kerd bi cezaya tewr giran biameyîne cezakerdene."

	 

	'Pinare cinîyêka bi hêz û cesaret bî'

	 

	Dayîka Pinare dîyar kerd ke kênaya aye zaf bihêz û cesaret bî la bi hawayêk wehşî ameye qetilkerdene. Şefîka wina va: "Eke edalet bibayîne, ganî her kesê ke cinîyêk kişt bi cezaya tewr giran biameyîne cezakerdene. Musa Orhan bi sebebê merdişê cinîyêke ciwan û ewro teber de geyrayîne. Ganî Musa Orhan cezaya tewr giran bigirewtêne. Dima ra Pinare bi desan cinî ameyî qetilkerdene. Eke versuc biameyîne cezakerdene do hende cinî nêameyîne qetilkerdene.  Qîmetê cinîyan çin o."

	 

	'Ganî kiştoxî cinî bêrê pawitene'

	 

	Şefîka va kesê ke heqê cinîyan pawenê, yenê cezakerdene û va: "Ganî qanûnê ke bi hêz bibê cinîyan bipawê. Bi seyan wezîfedarê asayîşê pawitişê kiştoxê kênaya mi kerdî û seba ke çîyêk nêro sereyê ey. La kesê ke reaksîyon ramojnayî zî bi astengîyan dir rî bi rî mendî. No çî edalet nîyo. Cinîyê ke kuçe de heqê xo geyrenê yenê astengkerdene. Sucê ê cinîyan nîyo. Ganî dewlete pawitişê cinîyan bikera. Heta ke qanûnî nêrê vuryane do kiştişê cinîyan dewam bikero. Eke cezayêke giran nêro dayene ganî bêro zanayene ke Tirkîya de edalet nêmendo."

	 

	'Tirkîya de edalet nêmendo' 

	 

	Şefîka dewam de wina yo: "Eke roniştiş de dozger û dadgerê cinî bibayîne, belkî heqê ma cinîyan bipawêtêne. Salona edalet çin bî. 4 saetan qalê kiştox kerdî. Her çî werte de yo ez nêzana bendeyê çî yê?? Gelo wazenê delîlê ke estê werte ra wedarnê. Kênaya mi bi wehşî ameye kiştene. Ez nêwazena roniştiş derg bikerê. Gama ke ez kiştox vînena, zerrîya mi dejena. Ez umîd kena edalet bi ca bîyarê. Eke cezayêke giran nêro dayene êdî bawerîya mi edaletê Tirkîya nîno û êdî Tirkîya edalet xelas bîyo."

	 

	'Ez o têkoşînê xo dewam bikera' 

	 

	Şefîka tewr peyîn qiseykerdişê xo de veng da cinîyan û va: "Ganî cinî, ciwan û komel seba pawitişî heqê cinîyan serewedarnayî. Kesê ke hemverê kiştişê cinîyan veng nêkenê, hemkarê kiştoxan ê. Seba pawitişê cinî, ganî qanûnî bêrê vetene. Semedê kiştoxê cezaya muebbetê giran bêro dayene. Ganî cinî wayîrê heqê xo vejîyê. Ez o têkoşînê xo dewam bikera, heta ke kiştoxê kênaya mi cezayêk giran bigîro."