Cinîyê Nisêbînijî: Qeyûm bi zanebîyayîş rayîran nêvirazneno  

2020-11-19 14:42:47


	 

	MÊRDÎN - Ameyîşê varanî reyde siqaqê Nisêbînî mîyanê herre de mendî. Hemwelatijî derheqê rayîranê xirakerdeyan yê Nisêbînî de qisey kerdî û dîyar kerdî ke qeyûm karê xo nêkeno.

	 

	Bi serran o ke siqaqê qezaya Nisêbînî yê Mêrdînî bi ameyîşê varanî reyde mîyanê herre de manenê. Emserr zî ameyîşê varanî reyde rayîrê xirakerdeyî mîyanê herre de mendî. Ne merdim û ne zî wesayît nêeşkenê nê rayîran ra derbaz bibî. Hemwelatijî her çiqas gere bikerê zî netîceyêk nêvejîyeno û goreyê vatişê hemwelatijan qeyûm înan rê xizmetêk nêkeno. Hemwelatijî qiseykerdişan de talebê xizmetî kerdî.

	 

	‘Problemê ma nêqedîyenê’

	 

	Tewr vernî hemwelatijan ra Hayrîye Akara ya ke taxa Azadîye de ronişena qisey kerde û va: “Raşte û siqaqî bi serran o xirakerde yî. Wexto ke hamnan beno toz û wexto ke zimistan beno zî çamir tîya ra kêm nêbeno. Cereyan binê erdî ra ancenê û cayê xirakerdeyan zî wina verdenê. Çamirê zimistanî ver ama nêeşkenê keye ra bivecîyî. Wexto kem a biveîyî teber zî ferqê zerre ê teberî ra nêmaneno. Wexto ke ma mecbur şorê teber zî keye mîyanê çamir de maneno. Hamnan zî toz vera pakîya ma çin o. Problemê ma yê sey cereyan, çamir, toz û awe estî.”

	 

	'Qeyûm karê xo nêkeno'

	 

	Remzîye Ateşa ke eynî taxe de ciwîyena zî dîyar kerd ke qeza rê çi lazim bo nîno kerdene û wina va: "Kuçeyê ma xirakerde yê. Ne hamnanî ne zî zimistanî ma nêeşkenê rehet bibê. Lazimîyê qeza yê sereyîn wina nînê pêşwazîkerdene û problemî nînê çareserkerdene. Qeyûm karê xo nêkeno. La seba reklaman çîyê ke girîng nîyê virazneno. Ma rayîrêk baş wazenê. Ceyrano ke ke yeno viraştene, seba ke m ara ceza bêra birnayene yeno viraştene. Heme çî ra ma r apere gênê la xizmet nêkenê. Her cayî de berjewendîyê xo fikrîyenê. Înan Nisêbîn xira kerdî û nika zî awan nêkenê. Çîyêk nêkenê. Serê nê rayîran de domanê ma nêeşkenê vejîyê û kay bikerê. Ma bi şeklêk hewil danê ke îdare bikerê. Ma xîz û kerreyan vera danê rayîr heta ke zimistan şêro. La na rewşe do heta key wina derbaz biba. Kes rewşa ma pers nêkeno. Ma wazenê ke her kes karê xo bikero."

	 

	'Ma xizmet wazenê'

	 

	Semîre Şahîn zî wina qisey kerd: "Ma heta nika xizmetêk baş qeyûm ra nêdîyo. Herre û awa ke kuçeyan de kom bena, yena zereyê keyeyê ma. Her kes seba berjewendîyê xo kar keno û ma danê xebitnayene. Semedê rewşa kuçeyan ma xeylê rey gerre kerd la çîyêk ma ra vanê no yo, "La kuçeyan ma wina kerdo." La êdî bes o, ma xizmet wazenê."

	 

	'Bi zanebîyayîş rayîran wina verdenê'

	 

	Aysel Kardaş zî tewr peyîn reaksîyon ramojna û wina va: "Ma bac bi her tewir danê dewlete, la hemverê nê tu xizmetê nêgînê. Gelo no pere şino ça? Dewlete xêrcê zerarî çîyêk nêda ma. Ma zî merdim ê. Bi serran o ma mîyanê na herre de ciwîyenê. Bi zanebîyayîş wina kenê. Wazenê ke îşkence bi ma bidê kerdene."