Netîce Kalkan: Mado wayîrê erjanê xo vejîyê 

2020-11-18 13:26:22


	 

	MÊRDÎN - Hemsereka MEBYA-DERî Netîce Kalkan, dîyar kerd ke MEBYA-DER yeno manaya wayîr vejîyayîşê erjan û va: "Komeleya ma pêwa heme astengîyan do kîşte keyeyan de bo û wayîrê erjê xo vejîyê.”

	 

	Komeleya Kultur, Paştdayîşî û Hetkarîyê Kesê ke Dergûşê Şaristanî Merdimê Xo Vinî Kerdê (MEBYA -DER), bi sloganê, "Ma do bi hêzê xo yê rêxistinî erjanê xo bipawê” 1in Kongreya xo ya asayî Mêrdîn de organîze kerdibî. Kongre de Netîce Kalkan û Mehmet Akpinar seke hemserek amebî weçînayene. Netîce serê rol û mîsyonê komela û derheqê babetan de ajansê ma rê qisey kerd.

	 

	Netîce, destpêkê qiseykerdişê xo de bale ant serê xebatênê komele û va: "Semedo ke ez layiqê na xebate ameya, ez zaf kêfweş a. Na komele manaya ci girîng esta. Ma zî yew nê keyeyan rê yê ke dergûşê şaristanî de merdimê xo vinî kerdê. Ez wazena ke vajî kongre rojêk ke wateya xo ya giran ya tarîxî de ameya organîzekerdene. Ma do giranbîyayîşê roje ra xebatê xo bikerê. MEBYA-DER yeno manaya wayîr vejîyayîşê erjan û ma do seba nê erjan heta peynî têkoşîn bikerê.”

	 

	‘Ma do pêwa pêro astengîyan bixebityê’ 

	 

	Netîce, bale ant serê tehdîd û padayîşê komeleyan û wina va: “Verê MEBYA-DERî, TUHAD-FED û MEYA-DER estbî. La komeleyê ma bi hawayêk bêhuqûq ame padayene. Nê prosesî de bi desan komeleyê bîn ê kulturî bi hêriş dir rî bi rî mendî û bi eynî rengî ameyî padayene. Hişmendîyê sîstemî yê serdest xo nê hêrişan ser serê lingan de verdeno. Seba ke merdimî bêveng verdê her tewir metod xebotnenê. MEBYA-DER seba pêro xebatanê xo çi lazim bo do bikero. Do her wext ma rê hêriş bikerê, girîng oyo ke ma hemverê înan xo amade bikerê û bi rêxistin bikerê. Ma do pêwa heme astengî û tehdîdan xebatanê xo bikerê.”

	 

	‘Ma do wayîrê erje xo vejîyê’

	 

	Netîce, dewam de wina va: "Heta ke ma merdanê xo nêsepernê herre, şîn nêqedêno. Semedo ke no şîn biqede ma do verê keyeyanê xo de bê. Heqê her kesî esto ke serê herra xo de bêro erdkerdene. Ma do bi her hawa kîşte keyeyanê xo bê. Komele pêro keyeyan a. Yê kesê ke wayîrê erjanê xo vejênê ê hemin a. No het ra her kes hîsgêr nêzdî bibo û paştdayîş bido komele. Ganî keyeyê ma bibê endamê komele û tîya pîya mîyanê têkilî de bê. Oyo ke hêz bido ma û ma serê lingan de verdo no yo.”

	 

	‘Ganî keyeyî xo biresnê ma’

	 

	Netîce tewr peyîn wina va: "Ma sozê averbîyayîşê xebatanê xo sere de da. Hema demêk kilm o ma ameyê weçînayîş. Nika ma bi çend keyeyan dir bî hetkar. Sere de amancê ma oyo ke ma xo biresnê heme keyeyan û înan dir bikewê têkilî. Ma wazenê şîn û şayîyê înan pare bikerê. Goreyê mi no wezîfeyêk tewr giran o û erjo serê milê ma de. Ma umîd kenê ke her keyeyêk bi nê rengî nêzdîyê ma bibo. Hedîseyê nê rengî de ganî xo biresnê ma. Hetê huqûqî de ma pîya eleqedar bê.”