Soma de cinî hemverê şîdetî xover danê 

2020-11-17 14:59:10


	 

	Melîke Aydin

	 

	MANÎSA - Cinîyê ke Soma de ciwîyenê, nosyonê şîdetî baş nîno zanayene û yeno waştene ke êdî normal bêro vînayene. Cinîyê ke ardî ziwan ke ê heqê cinîyan tam nîno zanayene, vatî ke ganî platformê cinîyan hîn zêde biresnê cinîyan.

	 

	Cinî 25ê Teşrîna peyêne Roja Şîdetî serê Cinîyan de xopawitişî esas gênê û vejenê wareyan. Serrê peynî yê ke şîdetê camêrd-dewlete zêde bîyo de cinî bi cuyêka rêxistinkerde keye û wareyê her cuye bi sloganê, "Ma xo pawenê" qîrenê.

	 

	Cinîyê Somayî ciwîyenê zî cinî xo aver berê, platformê cinîyan hîn zêdeyêr xo biresnê cinîyan. cinîyê ke dîyar kerdî ke bêtêduştî tewr zêde mîyanê keyeyî de qewimyayî pêro cinî mil bidê milê yewbînan.

	 

	'Semedê xopawitişî ganî bawerî virazyo'

	 

	Kedkara keyeyî Sevda Dibektaş ard ziwan ke şîdet esto û va: "Semedê cinî xopawitişî xo aver berê, ganî destpêk de bawerîya înan virazyo. Yeno waştiş ke şîdet bêro normalkerdene. Qanûn zî bi ca nîyanê. Wextê dûrvistişî yê camêrdan keye peynî bo zî cinî kuçe û meydanan de ameyê qetilkerdene. La camêrd zî serbest vera danê. Ma çend rey nê çî dîyo."

	 

	'Ziwanê medya şîdet normal keno'

	 

	Mamoste Arzû Hizli da zanayîş ke wareyê normalkerdişî şîdetî zêde esto û va: "Şîdet xeberan de bi hawayêk magazînwarî yeno dayene. Sewîyeya ci merdimî teşwîqê şîdetî keno zî ez vana nîno verê çiman. Ma xeylê rey wanenê ke serê cezaya ke do camêrd bigîro, nîno vindertene û xeylê rey zî bi camêrdan çîyêk nêbeno. Ganî sazgehê ke cinîyê ke şîdet vînenê seba ke muracat bikerê hîna zaf bêrê awankerdene. Sazgehê ke estê qîm nêkenê. Sewbîna ganî platformê cinîyan zî hîna zaf xo biresnê cinîyan."

	 

	'Cinî seba tedayê komelî bêveng manenê'

	 

	Emîne Îşleka ke Soma de kuafor de xebityena wina va: "Cinî seba bawerîya înan virazya, ganî bi xo bawer bê. Xeylê cinî hetê ekonomî de mecbûrî camêrdan benê. Cinî wexto ke mecbûrî camêrdan bê hîna bi hêz benê. Soma de tewr zêde şîdet û tîryakî esto. Xeylêk cinî tersenê. Gerek muracatê cayê hemverê şîdetî yê bikerê, la nê ra zî tersenê."

	 

	'Bêedaletî tewr zêde mîyanê keyeyî de qewimyeno'

	 

	Gulfîdan Kose ya ke mêrdeyê aye bobelatê Somayî de dinyaya xo bedilna û wina va: "Cinî tewr zêde zereyê keyeyî de rastê şîdetî yenê. Camêrdî zî tena pereyê bazarî danê cinîya xo û cinî xo mecbûr vînena ke milê xo rona. Cinîyê ke xebityenê zî estê la ê zî rastê şîdetê mêrdeyê xo yenê. Cinîya ke xebityena pereyê xo hem domananê xo rê û hem zî mêrdeyê xo rê xerc kena, la mêrdeyî wina nîyê. Ganî cinî hemverê nê têkoşîn bikerê û her ca de xo birêxistin bikerê."

	 

	'Soma de hamnanî 90 tl danê kedkaranê citkaran'

	 

	Kedkara keyeyî Emîne Direksiz wina va: "Soma de hamnanî 90 tl danê kedkarê citkarî. No zî bi asayîş nîyo. Mêrdeyê mi nêverdeno ke ez bixebityî. Mi zaf waştêne ke ez bixebityî la mi va domanê mi estê ez nêxebityaya. Ez 18 serrîya xo de zewicyaya û 19 serrîya xo de bîya dayîk. Seba 3-4 domanî pê ser ameyî dinya, mêrdeyê mi nêwaşt ez bixebityî. Ez hema newe xebityena la bi yewmiyan."