‘Yewîya Kurdan do seba Rojhelatê Mîyanên hizûr bîyara’ 

2020-11-16 14:23:11


	 

	AMED - Îdarekara MEBYA-DERî Meryeme Soylu bale ant serê girîngîyê yewîya şarê Kurdî û va: "Eke ewro ma yewîya xo awan bikerê, ma do bibê hêzêk dinya. O wext tu kes nêeşkeno vernîya Kurdan vindero.” Dayîka Aştîye Hedle Ogur zî ard ziwan ke dişminê kurdan yew ê û hemverê Kurdan wayîr yewbînan vejîyê.

	 

	Reaksîyon û nêrazîbîyayîşê serê Herêma Kurdistanî dewam keno. Her çar parçeyê Kurdistanî û Ewropa şarê Kurdî semedo ke şerêk birakiştişî nêvejîyo rayrayîş û çalakîyan viraznê. Sewbîna demêk derg o ke vengdayîşê organîzekerdişê kongreya mîyanneteweyî yeno kerdene û waştiş yeno kerdene ke Partîya Demokratîke ya Kurdistanî (PDK) beşdarê nê kongreyî bibê. Îdarekara MEBYA-DERî Meryem Soylu û Meclisê Dayîkê Aştîye ya Rihayî Hedle Ogur vengdayîşê yewîye partî û rêxistinê kurdan kerdî.

	 

	‘Ma destkewtişê xo bipawê’

	 

	Meclisê Dayîkê Aştîye ya Rêhayî Hedle Ogur dîyar kerd ke dişminê kurdan yew ê û va: “Ma nêwazenê gonîya Kurdan bêra rijnayene. Xêrcê kurdan dostê înan çin o. Wa Barzanî zî fek vatişê şerwaştişî vera bido. Çira destê xo dano destê dişmin. Ma qey dişminê kurdan yew nîyê ke yewbînan dir bibê yew. Ganî semedê deskewtişê xo û berjewendîyê şarî, wayîrê yewbînan vejîyê. Xora ma hedefê pêro dinya de yê. Heme dinya serê kurdan de kay kena. Dişminê ma hemverê ma eşkenê bibê yew, la ma hema nêeşkenê hemverê dişminî yewîya xo awan bikerê. Ma na rewşe de mecbur ê ke bibê yew.”

	 

	‘Ganî Barzanî nêro kayan’

	 

	Îdarekara Komeleya Paştdayîşî, Yewîya û Kulturî ya Hetkarîya Kesê Ke Merdimê Xo Dergûşê Şaristanîyan De Vînî Kerdî (MEBYA-DER) Meryeme Soylu zî wina va: “Lazim o ke babeta birakiştişî mîyanê kurdan de nêvejîyo vernî. Tu feydeyê ci çin o. Tena parçekerdişê kurdan o. Wa PDK nêro kayê dewleta tirkî. Semedo ke dewleta tirkî hêrişê bikero tena kurdbîyayîş bes o. Wa şarê ma bi nê çîyan nêrê xapênayîş. Destpêkê komara Tirkiya de heta ewro dewleta tirkî her tewir hêrişê serê kurdan ceribnaya û hem zî hêrişê xo dewam kena. Semedo ke serdestîyê xo serê kurdan ramojna bêmabên hêriş kena.”

	 

	‘Yewîya kurdan do hizûr bîyara Rojhelatê Mîyanên’

	 

	Meryeme semedê yewîye veng da û va: "Ça de Kurdî bibê, ganî destê xo bidê yewbînan. Seke vatişê Cigerxwînî, ‘Eke ma nêbê yew ma do şêrê yew bi yew.’ Eke ewro ma yewîya xo awan bikerê, ma do bibê hêzêk dinya. O wext tu kes nêeşkeno vernîya kurdan vinderê. Semedê her çar parçeyê Kurdistanî yewîye lazim a. Tena semedê şarê Kurdî ney. Sewbîna hizûrê Rojhelatê Mîyanên zî ana. Ewro serekê ma tena semedê Kurdan ney,  semedê Rojhelatê Mîyanên zî sey serek yeno vînayne.”