Tehlukeyê cuya Evîna ke bi çekê polîsan birîndar bî dewam keno 2020-11-14 15:36:05   WAN - Tehlukeyê cuya Evîn Kanli ya ke hetê polîsan ra ameye birîndarkerdene dewam keno. Dayîka Evîne, Fatma Kanli va: “Evîne beno ke dinyaya xo bi bedilna. Evîne sekerat de ya.”   Amebi vatene ke 27ê teşrîna peyêne de kuçeyê Kumbêtî yê Norşînê Bedlîsî de polîsan Evîn Kanli bi giranî û mêrdeyê aye Ferit Kanli zî lingê ci ra birîndar kerdê. Evîna ku destpêk de wedarnabî Nêweşxaneyê Dewlete ya Tetwanî 9ê teşrîna peyêne ra heta nika Servîsê Beşê Lezgîn yê Merkezê Tipî yê Dursun Odabaşi yê Nêweşxaneyê Cigêrayîş û Perwerdeyî yê Yuzuncu Yilî ê Wanî de yena tedawîkerdene. Doktoran dîyar kerd ke tehlukeyê cuya Evîne ya ke heta nika çar emelîyat derbaz kerda dewam keno.   ‘Polîsan kênaya mi erşawit adresê ke şîdet ci de dîne’   Fatma derheqê çîyê ke qewimî wina reaksîyon ramojna: “Kênaya mi hetê camêrdo ke ey dir zewicnayîbî xeylê rey bi şîdetî reyde rî bi rî mende. Ma şî verê polîsan û ma gerre kerd. Polîsan ma ra vat, 'mîyanê keyeyî de çareser bikerê'. Evîne reyna berdî camêrdo ke şîdet ci rê kerdene. Semedê şîdetî şî stargeh de mende. Mi kênaya xo berd Stenbol û mi verê merdimanê xo de bi ca kerd. Camêrdo ke aye dir zewicnayebi, her wext tehdîd kerdêne. Roja ke hedîse ameye meydan zî Evîne verê kalikê xo de bî. Polîsî ameyî seba mêrdeyê ci aye îkna bikerê bi zor ê girewtî. Polîsan vat, 'ma soz danê çîyêk bi kênaya şima nêbeno.’ Labelê kênaya mi bi giranî birîndar kerdî."   ‘Polîsan gule rijna’   Fatma qalê roja serebûtî kerd û wina va: "Polîsî seba mêrdeyê Evîne bitepşênê, Evîne xebitnayî. Peynî de camêrdo ke Evîne dir zewicnayebi, Evîne rehîn girewt. Polîsan zî zanayîne ke Evîne keye de ya la reyna zî gule rijnayî. Şahidan zî dî ke polîsan gule vera dayo Evîne.”   Keyeyê Evîne bi merg tehdîd kenê   Fatma dîyar kerd ke Ferit Kanli û keyeyê ey tehdîdê mergî înan rê kenê û wina va: "Asayîşê ma çin o. Mêrdeyê ci her wext mi tehdîd keno. Mi ra vano ke ez o fek kênaya to ra vera bidî û to bikşî. Mêrdeyê mi ra vano ke ez o goşê to tira bikerî. Polîsan senîn kênaya mi berd verê nê zalimî. Nika kênaya mi nêweşxane de sekerat de ya.”   Fatma tewr peyîn va: "Kêna mi beno ke şêro rehm. Ez o se bikera nêzana. Çira dewlete da kênaya mi ro?”