Cinîyê Dêrsimijî semedê 25ê teşrîna peyêne veng dayî

2020-11-13 15:26:44


	 

	Safiye Alagaş

	 

	DÊRSIM  - Cinîyê Dêrsimijî vengdayîşê tewrê çalakîyê 25ê teşrîna peyêne Roja Têkoşînê Hemverê Şîdetê Serê Cinîyanê Dinya kerd.

	 

	Temamê dinya de cinî amadekarîyê çalakiyê 25ê Teşrîna Peyêne Roja Têkoşînê Hemverê Şîdetê Serê Cinîyanê Dinya kenê. Cinîyan dîyar kerd ke ê do heta 25ê Teşrîna Peyêne wareyan de bê û  25ê Teşrîna Peyêne de zî do çalakîyê xo yê fînalî bikerê. Cinîyê Dêrsimijî zî dîyar kerdî ke ganî hemverê şîdetî wareyan de bê.

	 

	‘Ez o hemverê şîdetî wareyan de bî’

	 

	Guneşe Dogan dîyar kerd ke xoza serê têduştî de awan bîya û va: "Hetêk ra îqtîdar û hetêk ra zî hîn kesî seba waştişêk înan qij zî bi ca bêro, şîdet vînenê. Hemverê qanûnê xozayî yo û nîno qebulkerdene. Cinî û camêrdî ganî têduşt bê.  Senîn ke ma vanê darêk ra zî şîdet nîno kerdene, cinîyan rê zî nîno kerdene. Cinî xebityena û warê ekonomî de paştdayîş dana keyeyê xo. Weykerdişê domanan bigîrê û heme karê keyeyî reyna cinî kenê. Ez hemverê şîdetî ya. Seba ke ma cinî yê, ma her wext yenê bêvengkerdiş. Ez o hemverê şîdetî wareyan de bî. Semedo ke ez cinî ya. Semedo ke mêrdeyê mi nika tîya nîyo ez rehet qisey kena.”

	 

	‘Ez hemverê şîdetî bi serran o têkoşîn kena’

	 

	Ferîde Kit zî va ke cinî bedelê giran danê û wina va: "Ez bi xo zî bi serran o hemverê şîdetî wareyan de têkoşîn dana. Nika ra tepya zî ez o têkoşînê xo dewam bikerî. 5 hezar serrî yo ke camêrdî serdest ê. Ma zî semedê şîdetî camêrdan bedelê giran danê. Ganî hemverê şîdetî ma do wareyan de bê. Ewro zî camêrdî serwerî şîdet xo serê cinîyan dewam kenê. Ma Dêrsim de şîdetêk zêde vînenê. Ez o hemverê şîdetî wareyan de bî û xebatan dewam bikerî. Ganî heme cinî wayîrê 25 teşrîna peyêne vejîyê.”

	 

	‘Ma azad nîyê’

	 

	Îlknure Dogan zî va ke pêro wareyan de şîdet vînenê û va: "Bi çend serrî yo ke tewrê çalakîyê 25ê teşrîna peyêne bena. Her kes sey ke ma azad ê vînenê. La ma azad nîyê. Azadîya ma tena bi cilanê ke ma danê xo ra û sereyê ma akerdeyo yeno naskerdene. Cinî semedo ke pî, bira û mêrdeyê xo ra tersenê bêrê çalakîyan. Ez a bawerî de nîya ke cinîyê Dêrsimijî azad ê. Xebera cinîyan nasnameyê înan ra çin o. Ganî tewr zêde têkoşîn bêro dayene. Sazgehê ke paştdayîşê cinîyan kenê zî zêde yê. Ganî hîna zaf ma têkoşîn bikerê.”

	 

	‘Ganî ma bi rojêk sînordar nêmanê’

	 

	Evrîme Dag zî va ganî têkoşînê hemverê şîdetî bi rojêk sînordar nêro verdayene û va: "Tena 25ê Teşrîna peyêne ganî ma her wext wareyan de bê. Eke ma bi rojêk sînordar bikerê qîm nêkeno. Eke ma bi rojêk sînordar bikerê dimayê 25ê teşrîna peyêne ma do agêrê keye û do reyna bi ma şîdet bêkerê. Ma wazenê ke şîdet peynî bibo. Hîn cinî bi cesaret têkoşîn kenê la hîn zî tersenê û bêveng manenê. Ez o 25ê teşrîna peyêne de wareyan de bî. Wa heme cinî bi cesaret wareyan de bê.”