‘Vera çek û şer lazimîyê kurdan bi dîyalog esto’ 2020-11-13 14:19:38   AMED - Munaqeşeyê serê yewîya neteweyî ya şarê Kurdî dewam keno. Cinîyê Amedijî ke derheqê yewîya neteweyî de fikrê xo ardî ziwan, dîyar kerdî ke ganî vera çekî bêrê xebitnayene û şer ganî yewîya neteweyî de esas bêro girewtene.   Munaqeşeyê serê yewîya ya şarê Kurdî dewam kenê. Vera nê munaqeşeyan nêrazîbîyayîş  her ke şino tewr zêde beno û seba ke mîyanê kurdan de şer nêbo xeylê cayê Kurdistanî çalakî û rayrayîş yenê kerdene. Cinîyê Amedijî zî reaksîyonê xo yê serê nê munaqeşeyê ke demê peyîn de yenê kerdene de ramojnayî.   ‘Eke bibê yew do bibê hêz’   Hedîye Aldemîr dîyar kerd ke şerê birakiştişî do parçebîyayîşê kurdan tewr kûr bikero û va: “Ma kurdî her ca de parçe parçe yê û welatê ma parçe kerdî. Eke kurdî bibê yew do bibê hêz. Wa goş nêdê hêzê ke têmîyanî kenê mîyan û pîya wa şer nêkerê. Şerê birakiştişî tu feyde nêdano şarê Kurd.”   ‘Şarê kurdî sere nêtewênê’   Bîrgul Înce zî va şarê Kurdî bi yewîya xo eşkenê hêrişê hemverê xo veng vejê û va: “ Kurdî xo ra bindest ê. Ma şêrê ça, rayîr vernîya ma de yeno padayene. Semedo ke kurdî parçe parçe bibê her tewir hêrişan kenê. Sewbîna semedê tedayê ke yenê kerdene çi heyf ewro şarê Kurdî serê rewşa xo zî nêeşkenê qisey bikerê. Kam çi vajo yeno tepiştene. La ma reyna zî sere nêtewênê. Ganî ma pîya bibê hêz. Bi yewî ma eşkenê azad bibê.”   ‘Vera xebitnayîşê çekan û şer dîyalog gerek keno’   Leyla Karakaş zî ard ziwan ke ganî kurdî xebitnayîşê çekî û şer bi dîyalogî problemê xo çareser bikerê û wina va: “Serê ma de bi serran o hêrişêk topyekûn esto. Pêwa nê yewan seba ke heqê xo bidest bikerê ma têkoşîn kenê. La nika zî bi destê dewletan kurdî pîya yenê sûrkerdene û yeno waştene ke kurdî yewbînan bikişê. Ganî êdî mîyanê kurdan de birakiştişî bi ca nêro. Ganî kurdî nêrê kayê dewletan û wayîrê yewbînan bivejîyê.”   ‘Ma nêwazenê gonî birijo’   Nurcane Karakaş zî veng da ke êdî nêwazenê gonî birijîyo û va: “Ganî kurdî bi yewîya nê kayan veng vejê. Ganî ma bêrê têhet û pîya bibê hêzêk pîl. Ma şerê mîyanên nêwazenê, tena waştişê ma aştî yo. Eke ma aştî bi ca bîyarê ma do nê hêrişan biqedênê.”   ‘Ma aştîye wazenê’   Merale Soken zî ard ziwan ke ganî binê versîya aştîye de kurdî yewîya xo awan bikerê û wina va: “Ez nêwazena tu kes bêro qetilkerdene û bêro kiştene. Ez seba kurdan yewîye û aştîye wazena. Ganî kes binê nameyê aştîye de bêrê têhet û yewîya xo awan bikerê.”