Tepişteya nêweşe Semîre Dîrekçî: Nêverdenê ez emelîyat bibî 2020-11-12 13:28:29   AMED - Hepsîya nêweşe Semîre Dîrekçî ya ke nêzdîyê 450 rojî yo ameya emeliyatkerdene û roqilayê aye teber de yê wina va: "Çîyo ke mi rê endîşe virazneno oyo ke roqilayê mi êdî nêeşkê bixebitîyê."   Semîre Dîrekçî (43) roja ke ameye tepiştene heta ewro 4 rey mezg û roqalayê xo ra ameye emelîyatkerdene. Bi temamî 7 rey emelîyat bîya. Roqilayê aye teber de yê û bi kîsê Kolostomi cuya xo dewam kena. Semîre ke bi 23 serrî yo zîndan de ya bi xeylê nêweşîyan kewta. Tansîyonê aye zêde yo çimê aye baş nêvînenê û semedê alerjî mecbûr a menga ra reyke derzîne xo ra do.   Semîra Zîndanê Girewte yê Cinîyan ê Amedî de yena tepiştene, muracatê nêweşxaneyê cîya kena la muracatê aye yê tedawî bi sebebê pandemî yenê redkerdene.   Semîre derheqê nêweşîyanê xo û îhlalkerdişê heqan yê zîndanan ser o mektube xo ajansê ma rê erşawit.   ‘Roqilayê mi teng bî’   Mektube Semîre wina ya: "Semedê nêweşîya xo ya roqila, ez her wext şîne nêweşxane. Ez prosesê 3 mengî ra tedawî ra derbaz bîya la mi tu netîce nêgirewt. Coka 25ê Tebaxa 2019 de emelîyat bî. Bi emelîyat roqilayê mi vetî teber û ardî ziwan ke heta 3 yan zî 6 mengan ez o baş biba. La roqilayê mi teng bîyê. Coka semedo ke hîra bibê, metodê hîrakerdişî xebitnayî. Tam ez o emelîyat bibayîne na rey zî vîrusê Korona vejîya.”   ‘Emelîyatê mi rê benê asteng’   Doktorî mi rê vanê eke emelîyat baş derbaz bibo zî semedê vîrusê Koronayî ti do se ra se dinyaya xo bi bedelnê. Zîndan de ma mîtanê şertanê zorî de ciwîyenê. Nêweşxane de zî vanê ke livînê veng çin ê û emelîyatê mi rê benê asteng. Ez çend şina nêweşxane ez her wext koxuşê karantîna de manena. Koxuşê  karantîna de ez mecbûr manena ke lazimîyê xo bi xo bivînî û no zî mi zaf mexdûr keno. Ez zaf zehmetîyan ancena.”   ‘Roqilayê mi ver bi xirabî şinê’   Ez mecbûr a her roj kîsê xo yê kolostomî bivurnî no zî rîskê enfeksiyonî zêde keno. Roqilayi mi ver bi xirabî şino. Ez tersena êdi nêxebityê. Nika roqilayê mi teber de yê no zî xeylê zehmet o. No mi rê bîyo sey îşkence û heqê min ê tedawî destê mi ra ameyo girewtene.   ‘Ez xo nêeşkena biresnê îmkanê weşîye’   Zîndan de ez nêeşkena tena sereyê xo cuya xo dewam bikera. Ez nêeşkena xo biresnê îmkanê weşîye. Nêdîyarbîyayîşê prosesê pandemî zî mi keno mîyanê endîşe. Ez wazena şima rewşa mi sazgeh û dezgeyan rê neql bikerê.