Eren Keskîn: Fatma Tokmak ganî bêra tehlîyekerdene

2020-11-11 14:50:12


	 

	Gulîstan Azak

	 

	STENBOL - Hemsereka Pêroyî ya ÎHDyî Erene Keskîn a ke hem avûkat û hem zî vasîsa tepişteya neweşîya girane Fatma Tokmake ya dîyar kerd ke ganî Fatma Tokma ya ke raporê ci, "nêeşkena zîndan de bimana” esto, bêra veradayene.

	 

	Fatma Tokmaka ke 1996 de ameye destbendkerdene, îşkenceyê giran ci rê amekerdene û nika Zîndanê Girewte yê Cinîyan ê Bakirkoyî de yena tepiştene û nêweşa giran a nîna tehliyekerdene. Fatma ke îşkenceyê giranî ra bi nêweşîyê giran kewta, pêwa raporê Weqfê Heqê Merdiman ê Tirkîya Şubeyê Stenbolî (TÎHV) yê, “nêeşkena zîndan de bimana” seba raporê Sazgehê Tipê Edlî yê, ‘eşkena zîndan de bimana” nîna veradayene.

	 

	Fatma dir nêweşîya qelbî esta û bi raporê Tipê Edlî 2006 de amebî veradayene la 2010 de reyna amebî tepiştene.

	 

	‘Îşkence aye û domanê aye 2,5 rê ame kerdene’

	 

	Avûkat û vasîsa Fatma, Erene Keskîn nêeşkena bi Fatma dir pêvînayîş bikera. Destûrê nê nîno dayene. Hemsereka Pêroyî ya ÎHDyî Erene Keskîn wina va: "Fatma Tokmak seba sûcêk nêkerdo bi serran o zîndan de ya. Gama ke ameye tepiştene, wendiş û nuştişê aye çinbi û tirkî nêzanayîne. Bi domanê xo yê 2,5 serrî Azadî dir ameye destbendkerdene. Seba ke Fatma qisey bikera, îşkence bi Azadî kerdî. O wext na dewa xeylêk ameyîne zanayene. Dest û paşta domanî de cixara tefînayîbî. Azado qij bi serran travmayê nê çî ciwîya. Fatma heta 2005 tepişte ameyîne muhakemekerdene. Gama ke zîndan de bî nêweşîya qelbî kewte. O wext bi raporê tipê edlî serbest ameye veradayene. 5 serran teber de mende. Cezaya aye o wext hema dadgeha berzî de dewam kerdêne. Çike cezaya muebbetî girewtebî. Mi xeylê rey aye ra va şo teberê welatî. A zî vatêne, sûcê mi çin o û dadgeha berzî cezaya mi bi peynî bikero. Çi heyf, dadgeha berzî 2010 de ceza tesdîq kerd û Fatma reyna kewte zîndan.”

	 

	‘Rewşêka bi tehlûke ya’

	 

	Erene dîyar kerd ke pêwa raporê Weqfê Heqê Merdiman ê Tirkîya ê Şubeyê Stenbolî (TÎHV) "nêeşkena zîndan de bimana” seba raporê Sazgehê Tipê Edlî yê "eşkena zîndan de bimana” nîna veradayene û wina va: "Fatma zaf nêweş a. Ganî her hewte gonîya ci bêra vurnayene. La seba sebebê pandemî no çî nêbeno û coka rewşa aye zaf xirab a. Nêeşkena boye bigîro û canê ci mor bîyo. Na rewşêka bi talûke yo.”

	 

	‘No caardişêk bi kêfî yo’

	 

	Erene dîyar kerd ke aye hem avûkat hem zî vasîsa Fatma ya labelê reyna nêeşkena bi Fatma dir nêeşkena pêvînayîş bikera û wina va: "Tena vanê ke şima eşkenê pêvînayîşo girewte bikerê û ez nê qebûl nêkena. Çike bi serran o ez avûkata Fatma Tokmak a. Kesê ke mi vekalet dayê înan eşkenê bi Fatma dir pêvînayîş bikerê. Ez sey vasîsa ci nêeşkena pêvînayîş bikerî. No caardişêk bi kêfî yo. Coka bi serran o ez nêeşkena bi Fatma dir pêvînayîş bikerî.”