DAKPî ra vengdayîş: Ma do 25 Teşrîna Peyêne wareyan de bê

2020-11-11 12:38:26


	 

	AMED - DAKP, bi nameyê, "Hemverê tîryakî û tecawuzî ma xo şaristanê xo pawenê” startê çalakiyê 25ê teşrîna peyêne dabî. Vervatoxa Demî ya DAKPî Nîhal Yanik, dîyar kerd ke seba ma cinîyan her roje roja têkoşîn û xoverdayîşî ya û ma veng danê cinîyan ke tewrê çalakîyanê ma bibê.

	 

	Platformê Cinîyan ê Dîcle Amed (DAKP) bi minasebetê 25ê Teşrîna Peyêne Roja Têkoşînî yê Hemverê Şîdetê Cinîyan, 8 teşrîna peyêne de bi nameyê, "Hemverê tîryakî û tecawuzî ma xo û şaristanê xo pawenê” startê çalakiyan da. Vervatoxa Demî ya DAKPyî û Hemsereka Şubeyê Tumbel-Senî ya Amedî Nîhal Yanîk derheqê babete de qisey kerd.

	 

	Nîhale destpêkê qiseykerdişê xo de bale ant serê hêzê cinîyan û va: "Îqtîdarê ke hêzê cinîyan ra terseno, bi sîstem şîdet hemverê cinîyan keno. Cinî zî bi xoverdayîş û têkoşînî cewab danê îqtîdar. 25ê Teşrîna peyêne bi xoverdayîşê cinîyan vejîya werte û bi tersê îqtîdaran."

	 

	Nîhale, dîyar kerd ke 18 serrî de hedîseyê taciz, tecawuz û şîdet vejîya sewîyeya cor û wina va: "Destkewtişê tewr girîng Pêameyîşê Stenbolî ke seba ke têduştîyê cinsî esas gêno û hemverê her tewir şîdetî yê cinîyan vindeno. Labelê îqtîdar nika pêameyîşî pratîze nêkeno û kerdo hedef zî. Heta ke cezayê giran nêrê dayene hûmara zêde bena. Camêrdî nê ra hêz gênê.”

	 

	Nîhale, dîyar kerd ke 25ê teşrîna peyêne seba cinîyan rojêk girîng o û wina va: "Hemverê şîdetî ganî vengêk xurt vejîyo werte û ma do 25ê teşrîna peyêne de pîya vengê xo berz bikerê. Sewbîna ma do têkoşînê xo tena seba rojêk nêkenê. Seba ma her roje roja têkoşînî ya. Sewbîna ma tîya reyke bîn veng danê cinîyan ke tewrê rayrayîşê ma yê 25ê teşrîna peyêne bibê.”

	 

	Bernameyê çalakîya DAKPyî wina yê:

	 

	"* Cinîyê ke endamê DAKPyî yê, do sazgehê xo rê pankartanê morî dalîqnenê. 

	 

	* Sewbîna balqonan de çalakîya daliqnayîşê pankartê mor bêro kerdene.

	 

	* 12ê teşrîna peyêne de Parkê Şemsê Allak ê Yenîşehîrî de fotografê cinîyê ke ameyê kiştene bêrê ramojnayene.

	 

	* 14ê teşrîna peyêne de Cehdeyê Cîhanî yê Peyasê Amedî ra heta wareyê Berê Koyî konvoyê makîneyê ê morî bêro organîzekerdene.

	 

	 

	* 21ê teşrîna peyêne de hetê Egîtîm-Senî ya Amedî ra turê bisikletan bêro organîzekerdene.

	 

	* 25ê teşrîna peyêne de zî Baxçeyê Hewselî de hemverê talankerdiş û texrîpkerdişê xoza rayrayîşêk girseyî bêro kerdene.