Krîzê ekonomî kûr beno: Welatî êdî nêeşkenê makarna û kartolan zî bigîrê 

2020-11-11 11:52:38


	 

	Hikmet Tunç

	 

	AGIRÎ - Serekkomarê tirkî rojê vîyarte de reaksîyon hemverê  welatijî ke vatibî, "Ma nêeşkenê nanêk zî berê keyeyê xo” ramojnabi. La welatijê Bazîdî ke ma mîkrofon înan rê derg kerd reaksîyon hemverê krîzê ekonomî dayî û vatî, "Ma êdî nêeşkenê kartol û makarna zî bigîrê.”

	 

	Serekkomarê tirkî Recep Tayyîp Erdoganî reaksîyon hemverê welatijê ke vatibî, "Ma nêeşkenê nanêk zî berê keye” dabî û serekkomarî vatib, "şima babete pîl kenê.” Sewbîna Wezîrê Karê Malî û Ekonomî Berat Albayrak zî bi sebebê problemê ey weşîye estê, îstîfa kerd. Her çiqas ke îqtîdar krîzê ekonomî peygoş keno zî rewşa welatijê qezaya Bazîdî ya Abiri rewşe fînenê verê çiman.

	 

	‘Ma nêeşkenê debara xo bikerê’

	 

	Rukiye Koça ke bazarê taxe ya Bazîdî yê Agirî ra amebî wina va: "Mi 4 torbeyê qij makarna girewt, 5 kîlo zî kartol girewt û pereyê mi êdî nêmend. Heme çî zaf vay bîyo. Ma vanê bazar erjan o û ma yenê. La ma nêeşkenê bazar ra zî çîyêk bigîrê. Şar vêşano, do krîz senîn biqedîyo nêzana. Ma êdî nêeşkenê debara xo bikerê û ma nêeşkenê semedê xo nanêk zî bigîrê. Krîzo bîyaye kesê ke dewlemendê tewr dewlemend kerd û yê feqîrî zî tewr zêde feqîr kerd.”

	 

	‘Heta hukmat nêvuryo do krîz dewam bikero’

	 

	Zilfenaz Kebîde ya ke seba çîyan bigîro ameya bazar û va ke seba fêkî û sebze bigîro pereyê ci nêmendo. Zulfînaze wina dewam kerd: "Ez o tirşî bi laneyê ke mi bi 30 TL girewto viraznî. Ma seba zimistanî vayî ra tu çîyêk amade nêkerd. Sebebê nê krîzê ekonomî AKP yo. Heta ke no îqtîdar ser de bo, do no krîz dewam bikero.”

	 

	‘Sebebê krîzî îqtîdar o’

	 

	Îfet Erzene zî va, lajê ci înşaetan de xebityeno, seba ke zimistanî zî karê înşaetan zêde nêmaneno û wina dewam kerd: "Ma êdî nêeşkenê domananê xo wey bikerê, înan rê çîyêk bigîrê. Seba bêkarî ma nêeşkenê kîrayê xo bidê. Keyeyê ke nêeşkenê debara xo bikerê veradayîş xo rê sey çareserî vînenê. Sebebê krîzî îqtîdar o.”

	 

	‘Ma bi nano wişk û kartolan sifreyê xo danê ro’

	 

	Helîme Demîr zî diyar kerd ke nêeşkenê nanêk zî bigîrê û wina va: "Keye de werd çin o, lajê mi nêxebitîno, ma bi kartol û nano wişk sofreyê xo rê danê ro. Ma do heta key nê ezîyetî biancê nêzana. Homa nêverdo.”

	 

	‘Ma makarna wetayêr çîyêk nêeşkenê bîyarê sifre’

	 

	Ayşe Yildirim zî va ke verê krîzî de nêweşîyê aye zî estê û va: “Ez dermanê nêweşîya xo nêeşkena bigîrê û makarna ra wetayir çîyêk nêeşkena bîyarî sifre. Lajê mi înşaetan de xebityeno, ey zî cinî û domanê xo ardê verê mi û teberê şaristanî xebitêno. Ma nêeşkenê debara xo bikerê.”