‘Ma hemverê polîtîkayê bêedaletî xo bi rêxistin kenê’ 2020-11-10 16:09:31   STENBOL - Meclîsê Cinîyan ê HDPyî yê Stenbolî bi çalakîyê 25ê teşrîna peyêne de hemverê, "polîtîkayê bêedalet yê dewlete” amanc kenê ke cinîyan bîyarê têhet.   Meclîsê Cinîyan ê Partiya Demokratîke ya Şaran (HDP) verê rojêk Wareyê Azadî ya Bakirkoyî bi eşkerayîyêk startê çalakiyê 25ê teşrîna peyêne Roja Têkoşînê hemverê Şîdetê serê cinîyan de dabi. Mîyanê çalakîyan de babetê sey; şîdetê serê cinîyan, Pêameyîşê Stenbolî, tesîrê ekonomî serê cinîyan, hîrakerdişê hişmendî û xeylê bînî cayê xo de gênê.   ‘Ma do vengê cinîyan berz bikerê’   Vervatoxa Meclîsê Cinîyan ê HDPyî yê Stenbolî Besere Çelik derheqê çalakîyê 25ê teşrîna peyêne de zanayîş da. Besere derheqê çalakîyê 25ê teşrîna peyêne wina va: “Teberê plansazîyê meclîsê cinîyan ê îdarekarîyê herême zî estê. Ma seba vengê cinîyan berz bibê û şîdeto ke zêde bîyo, peynî bêro bi peynî bibo panel, pêvînayîşê cinîyan organîze bikerê û sînevizyonan temaşe bikerê."   ‘Hemverê polîtîkayê dewlete ma do têkoşîn bikerê’   Besere dîyar kerd ke ê do hemverê polîtîkayê dewlete torra herêmî hîra bikerê û wina va: "Pêameyîşê Stenbolî girîng o û ganî bêro bicaardene. Ma do çalakîyan de serê Pêameyîşê Stenbolî de qisey bikerê û munaqeşe bikerê. Ma do çalakîyê tewir bi tewir bikerê û semîneran bikerê.”   ‘Do cinî tewr zêde xo bi rêxistin bikerê’   Besere dîyar kerd ke cinî wareyê ekonomî de probleman ciwîyenê û va: "Seba problemê ekonomî mîyanê cinîyan de problem vejeno werte. Ma do 25ê teşrîna peyêne de hem zî pey ci bi sazgehê bînan ê cinîyan dir torra xo ya rêxistinî aver berê û do hîna zaf cinî xo birêxistin bikerê.”   ‘Ganî cinî ma dir bikewê mîyanê dîyalogî’   Besere dîyar kerd ke ganî cinî înan dir bikewê mîyanê diyolog û wina va: "Pêro cinî bi rengê xo tewrê nê têkoşînî bikerê, ganî ma dir bikewê mîyanê diyalogî. Dewlete verê ke rengê cinî biewna, polîtikayê xo yê şîdetî xebitnena. Nasnameyê cinîyan zî çi beno wa bibo ma amanc kenê ke pêro cinîyan dir bêrê têhet.”