Dayîkê Aştîye: Wa êdî gonî nêrijîyo 2020-11-10 14:31:08   AMED - Endamê Meclîsê Dayikê Aştiye yê Amedî dîyar kerdî ke rewşa Herêma Federal a Kurdistanî, merdimî keno mîyanê endîşeyan û va: "Ma dayîkî nêwazenê ke şer bêro kerdene û gonî birêjîyo. Ma wayê û birayê yewbînan ê û ma dişminê xo baş nas kenê. Şer feyde nêdano kurdan."    Reaksîyon û nêrazîbîyayîşê hemverê arteşa tirkî ya Herêma Federal a Kurdistanî de ameyê bicakerdene dewam kenê. Demê peyîn de hemverê şarê herême polîtîkayê teda û zordarî yenê kerdene û hetik ra zî hemverê herêmê HPGyî de leşkerê tirk û peşmerge ameyî bicakerdene. Rewşa krît her çar parçeyan kerd binê tehlûke. Endamê Meclîsê Dayîkê Aştîye yê Amedî derheqê babete de qisey kerdî û veng dayî Mesûd Barzanî.   ‘Şer feyde nêdano kurdan’   Gulîstane Erek dîyar kerd ke arteşa tirkî Herêma Federal a Kurdistanî de baregehê xo awan kena û va: "Nika hetê PDK û dewleta tirkî ra amadekarîyê şerî yenê kerdene. Şero ke vejîyo tu hawa feyde nêdano kurdan. Verê zî tecrûbeyê ma estbî, ma dî ke şerê mabêne kurdan de tena zirar dano kurdan. Ma veng danê her di hetan ke nêrê kayan. Ez veng dana Mesût Barzanî û vana, wa wina nêkero. Ma dayîk êdî nêwazenê şer bêro kerdene. Ma şerê ke yeno kerdene şermezar kenê.”   ‘Wa dayîkî hêsiran nêvarnê’   Nazîme Yurek pêwa ke desan rey ameya destbendkerdene û mêrde û 5 domanê aye dem bi dem ameyê destbendkerdene vengdayîşî aştîye kerd û va: "Çend bi şîdet mudaxaleyê cuya ma kenê zî ma her wext bî hetgirê aştî, wayê û biratî. Ma wazenê ke gonîya ke rijina wa vindero. Ganî şero ke Herêma Federal a Kurdistanî yeno kerdene, bêro vindarnayene. Eke Barzanî destûr nêdo, dewleta tirkî nêeşkena şêra herême û nêeşkena barêgehanê xo yê leşkerî awan bikera. Çira gonîya ciwanan bêra rijnayene? Ganî Barzanî baş bizano ke do hemverê ci zî şerêk bêro destpêkerdene. Nika hewl danê ke mabêne kurdan de şerêk vejê. Ma vanê ke êdî bes o wa dayîkî hêsiran nêvarnê.”   ‘Ma wayê û birayê yewbînan ê’   Rahîme Înce bale ant serê rewşa Herêma Federal a Kurdistanî û wina va: "Mêrdeyê mi û 2 domanê mi nika mîyanê HPGyî de yê. No şer, şerê mabêne kurd û Barzanî de yo. Dewleta tirkî wazena ke bi destê kurdan, kurdan bido kiştene. No çî layîqê Barzanî nîyo. Ez hêvî kena ke fek xeteyan ra vera bidê û nêwezana kes dinyaya xo bi bedelno. Ganî perşmergeyê xo uca ra bianco. Ganî leşkerê tirkî uca ra bêrê vetene. Ma wayê û birayê yewbînan ê. Ma tarîx de dî ke tu wext bi şerê birakiştişî serkewtişêk nêkewto dest.”   ‘Ma êdî aştîye wazenê’   Sultane Altan zî sey dayîkanê bînan bale ant serê rewşa Herêma Federal a Kurdistanî û wina va: “Eke herême de şerêk bo berpirsîyar Barzanî û hukmatê herême yo. Kurdî her wext bî hetgirê aştîye. Dewleta tirkî her wext bi zanayîş polîtîkayê bi no hawa kenê. Ganî kurdî hemverê nê ganî bi qerar û zanebîyayîş têbigeyrê. Ez veng dana Barzanî wa rayîr nêdê şerê birakiştişî. Ma wazenê ke aştî bibo.”