‘Wazenê desteştiş empozeyê komeleyê ma bikerê’ 2020-11-09 14:39:16   Medya Uren   MÊRDÎN - Endamê Platformê Cinîyan ê Şahmaranî reaksîyon hemverê têkiliyê ensest û polîtîkayê desteştiş û tecawûzî dayî û vatî: “Herême de seba polîtîkayê çewt hedîseyê ensestî zêde bîyê. Wazenê ke desteştiş û tecawuz empozeyê komeleyê ma bikerê.”   Tirkîya de tena menga teşrîna verêne de 22 cinî ameyî qetilkerdene, xeylê cinî rastê desteştiş û tecawuz ameyî. Bi hezaran hedîseyê bi nê rengî seba ke keye de yenê meydan yenê nimtene û serê înan yeno girewtene. Endamê Platformê Cinîyan ê Şahmaranî derheqê têkiliyê ensest (Têkiliyê cinsî ê mîyanê keyeyî de) û polîtîkayê tacîz û tecawûzî ajansê ma rê qisey kerdî. Cinîyan va netîceyê polîtîkayan hêrişê taybet ê.   ‘Benê sebebê vindîkerdişê erjê komelî’   Endama platformî Munevvere Irmak, bale ant serê zêdebîyayîşê têkilîyê ensest û wina va:  “Têkilîyê ensestî yê çewt ke mîyanê keyeyan de virazênê benê sebebê vindîkerdişê erjê komelî. Çîyo tewr bingeyîn yê komelî keno yew û bîyayîşê ci serê lingan de gêno exlaq o. Ganî ma çimanê xo nê hedîseyan rê nêgîrê. Lazim o ma nê hedîseyan asteng bikerê. Seba ke ma vernê hedîseyê nê rengî bigîrê, ganî ma projeyê perwerdeyî aver berê. No mîyanê komelî de bi rayîrê atolyeyê ke bêrê kerdene û perwerdeyê mekteban de yenê dayene eşkenê bêrê kerdene. Sewbîna bi taybet zî na babete de ganî camêrdî bêrê îqazkerdene û goreyê endîşeyê mi ganî cinî ney, camêrdî bêrê perwerdekerdene.”   ‘Ma do her wext verê cinîyan de bê’   Munevvere dewamê qiseykerdişê xo de bale ant serê polîtîkayê çewt yê desteştişî û tecawuzî ke herême de aver benê û wina va: “Wazenê desteştiş û tecawuz bîyarê rewşêka ke her kes normal bivîno. Ma nêeşkenê vajê ke desteştiş û tecawuz nika zêde bîyo. Hedîseyê winasî têkildarê polîtîkayê dewlete yê, la nika hişmendîyêk wina vejîyayo werte, nê lêşinîyê xo bi şeklêk akerde kenê. No wehşet o. Ma seke Platformê Cinîyan ê Şahmaranî hemverê nê polîtîkayanê desteştiş û tecawuzî vindarnê. Ma do her wext pêro şert û mercan de verê cinîyan de bê.”   ‘Camêrdî sîstem ra cesaret gênê’   Berîvane Koken zî wina dest bi qiseykerdişê xo kerd: “Tarîxo kan ra heta nika cinîyan rê şîdet yeno kerdene. Her wext seke cinsê diyîn, yan zî hîrên ameyê vînayene. Kêm ameyê vînayene. Seba ke hemverê nasnameyê cinîyan û hemverê destkewtişê ci hêriş ame meydan. Nika zî bi eynî rengî nê hêrişî dewam kenê. Nê demê peyîn de desteştiş, tecawûz û têkiliyê ensest rî danê. Ma her roje bi xeberêke qetlîam û tecawuzî çimê xo roje rê akenê. Tena menga teşrîna verêne de 22 cinî hetê camêrdan ra ameyê qetilkerdene. Bi seyan cinîyan rê zî desteştiş û tecawuz ameyo kerdene. No zî netîceyê ke sîstemê dişminê cinîyan awan keno yo. Bi polîtîkayê bêcezayî yan zî caardişê qanûnan dir nê çî yenê meşrûkerdene. Camêrdê ke nê caardişanê lêşin kenê, hêzê xo sîstem ra gênê. Seba nê sebebî zî ma seke cinî na rewşe û ameyoxê xo ra bi guman ê. Eke wina şêro rewşe tewr xirab biba.”   ‘Ma cinî pîya bi hêz ê’   Aygule Akkiliç zî dîyar kerd ke herême de nê çî zêde bîyê û va: “Têkiliyê ensest, polîtîkayê desteştişî û tecawûz her ku şino zêde benê. Nê dir zî exlaqê komelî xira beno. Merdim eşkeno pers bikero gelo çira nê hedîseyî zêde bîyê? Bê guman camêrdî hêzê xo dewlete ra gênê û hêrişêk winasî kenê. Seba ke êdî nê hedîseyî bi ca nêrê, ganî dad û sîstem bibê asteng. Ganî Pêameyîşê Stenbolî o ke hemverê şîdetê mîyanê keyeyî de yo bêro caardene. Ganî kerdoxî bêrê cezakerdene. Ma cinî zî hemverê nînan her wext wareyan de bê û têkoşîn bikerê. Seke Platformê Cinîyam ê Şahmaranî zî ma cinîyan dir pîya yê. Xebatê ma zî dîyarê ke cinî pîya bi hêz ê û do bieşkê her çî de serkewte bê. Ma do bi têkoşînê xo bieşkê nê polîtîkayê desteştiş û tecawûzî zî biqedênê.”