'Her nexşêke sembolê kulturê ma yo' 

2020-11-06 13:24:13


	 

	Rojda Aydin

	 

	ŞIRNEX - Cinîya koçer Leyla Savaci ya Hezex de destkarî kena wina va: "Viraştişê çente, lepik, papik, lûf  û xeylêk çîyê bîn adetê ma yê. Her nexşêke sembolê kulturê ma yo û ma bi destê xo kulturê xo yê verê danê ciwîyayîş."

	 

	Kardestîyê ke bi destê cinîyan yeno kerdene, adetêk verê yê komelê kurdî yo. Cinîyê Kurdî ke şert û mercê cîya de qetî bêveng nêmendê bi nê kardestîyê ke kerdê hem kulturê xo pawitê û hem zî her hokêke munayî dejê xo, xemgînî û kêfweşîyê xo qalî kerdê. La demê peyîn de seba ke teknolojî roj bi roje aver şina û fabrîka zêde benê no adet ver bi vinîkerdiş de şino. Cinîyê Kurdî pêro wextan de kulturê xo pawitê, bi neqşkerdişê kilîman, munayîşê papik, fanêlê ke bi destê xo viraznenê hemverê teknolojî têkoşîn kenê û kulturê komelê xo gane gênê. Nê cinîyan ra yew zî koçer Leyla Savacî ya. Leyla hem domananê xo rê papik, fanîlî viraznena û hem zî kulturê komelê xo pawena.

	 

	Leyla, va ke seba ke koçer ê cayêk aîdê înan çin o û wina dewam kerd: "Pêwa ke cayêk aîdê ma çin o, ma eşkenê her ca de bi ca bibê. Ma mewsîmê hamnanî de verê xo danê zozanan, zimistanî zî verê xo danê şaristan û dewan. Cuya ma her wext karê keyeyî û bi heywanan derbaz bena. Ma bi doman heywananê xo dir eleqedar benê. Ma dewe bi dewe û zozan bi zozan geyrenê."

	 

	'No zî seba ma bi sey adetêk'

	 

	Leyla, va kulturê kardestî pîranê xo ra musaya û va: "Ma dimayê karê keyeyî û weykerdişê heywananê xo qedênenê û wextê ma yê mende de zî ma bi destê xo seba domananê xo papik, lûfik û xeylêk çî bînî viraznenê. No kulturo ke pîlanê ma ra hata ewro ameyo ma zî hewl danê ke bi keda destê xo dewam bikerê û gane verdê. Bi karê ke ma kenê ma hem domananê xo serdî ra pawenê û hem zî ma kulturê xo danê dewam kerdene."

	 

	'Ma wazenê kulturê xo bipawê'

	 

	Leyla, dîyar kerd ke viraştişê papik û û lûfan yewbînan ra cîya yo û wina va: "Viraştişê papik, fanêlî û lufikan yewbînan ra cîya yo. Şîşê ke seba papikan yenê xebitnayene tenik ê. Seba ke kêlê lûfan ganî ê papikan ra wişk bê. La ê papikan hîna nerm ê. Papikêk reyan di rojan de qedêno, reyan zî çar rojan de qedêno. Goreyê nexşê xo vuryeno.  Nexşê ke zehmet ê, tewr zêde wext gênê. Ma nexşê xo nimûneyê verênan ra gênê û viraznenê. Her neqşêk sembolê kulturê ma yo. Ma zî bi destê xo kulturê xo yê verê danê ciwîyayîş. Gama ke ma nexşan viraznenê, tewr zêde ma rengê kesk, sûr û zer xebitnenê û ma nê nexşan de hîsê xo qalî kenê. Nê rengî zî seba ma bi mana yê. Ma bi nê rengan papikanê xo hîna bi reng kenê."