Tepişteya nêweşe Ozgule nêeşkena lazimîyê xo bi ca bîyara 

2020-11-04 14:48:47


	 

	AMED - Tepişteya nêweşe Ozgul Yaşa nêeşkena lazimîyê xo yê bingehîn bi ca bîyara. Birayê aye Eşref Yaşa dîyar kerd ke ganî pêro tepişteyê nêweşî serbest bêrê veradayene û va: "Nika mil û lingê aye tênêgeyrenê. Seba nê lazimîyê xo ca bîyara. Rewşa waya mi tehlûke de ya."

	 

	Zîndanê herême û Tirkîya de tepişteyê şert û mercê giran de ciwîyenê. Sewbîna kêmbîyayîşê tedbîrê hemverê vîrusê koronayî (Covîd-19) zî hûmara nêweşan her roje zêde benê. Heqê tedawîyê tepişteyê nêweşan yenê îhlalkerdene û tepişteyî bi mergî dir rî bi rî yenê verdene. Ozgul Yaşa ke Zîndanê Cinîyan ê Bunyan ê Qeyserî manena nîna dermankerdene.

	 

	Ozgule 5ê teşrîna peyêne 2014 de ameye tepiştene û heta nika 6 zîndanî vurnayî. Ozgula ke demêk kilm zîndanê Osmanî ra erşawitî zîndanê Karataşî ya Edeneyî, uca ra erşawitî zîndanê Cinîyan ê Tarsusî. Ozgule tewr peyîn surgunê zîndanê  Bunyan ê Qeyserî ameye kerdene. Birayê Ozgule, Eşref Yaşa, ajansê ma rê qalê rewşa waya xo kerd.

	 

	'Lazimîyê xo yê bingehîn nêeşkena bi ca bîyara' 

	 

	Eşrefî dîyar kerd gama ke Ozgule amebî destbendkerdene birîndar bî û çend rojan hucre de verdabî û va: "Ozgule birîndarî ameye destbednkerdene la tedawîya aye nêameye kerdene. Nika mil û lingê aye nêgînê. Lazimîyê xo bingehîn nêeşkena bi ca bîyara. Ozgule çend rey waşt ke berê nêweşxane la astengî vetî û aye tedawî nêkenê. Seba ke Ozgule hemverê îhlalkerdişê heqan vejîyabî, înfazê aye amebi veşnayene."

	 

	'Tepişteyê binê tecrîdî de yê'

	 

	Eşrefî dîyar kerd ke waye ci binê tecrîdî de ya û va: “Rewşa Ozgul her ke şino tewr giran beno. Ma rojê vîyarte de aye dir têkilî da ro. Ma seba rewşa aye weşîye mîyanê endîşeyî de yê. Seba ke Ozgule nêeşkena destê xo bixebitna, nêeşkena nan zî biwera. Xora zîndan de reyan nan zî nêdanê. Înan kerdê binê tecrîdêk giran. Bi no hawa hem hêrişêk bi fîzîkî hem zî psîkolojîk kenê. Polîtîkayêk bi no hawa serê tepişteyan de kenê."

	 

	'Wa tepişteyê nêweşî serbest bêrê veradayene'

	 

	Eşrefî tewr peyîn qiseykerdişê xo de veng da û va: "Zîndanan de asayîşê tepişteyan çin o. Endîşeyê serê tepişteyan her ke şino zêde beno. Ma zî tersenê û ma wazenê wa heme tepişteyî serbest bêrê veradayene."