Camêrdan ra waştişê zêdekerdişê xebatanê atolyeyê TJAyî 

2020-10-30 15:32:44


	 

	Melîke Aydin 

	 

	ÎZMÎR - TJAyî çarçewaya kampanyaya "Ma xo pawenê" de Îzmîr de bi babeta têduştîyê mabêne cinî û camêran de xebatêke atolyeye bi ca ard. Atolye de cinî û camêrdî serê rol û mîsyonê cinîyan ê mîyanê komelî de munaqeşe kerdî û vatî, atolyeyê bi nê rengî vurnayîşê camêrdan de do rolêk girîng kay bikerê.

	 

	Tevgerê Cinîyan ê Azad (TJA) çarçewaya kampanyaya "Ma xo pawenê" de xebatê tewir tewir goreyê taybetmendîyê şaristanan yenê kerdene. Kampanyaya ke ameya destpêkerdene, tesîrêk serê komelî de verdena. Îzmîr de zî xebatê kampanya ameyî destpêkerdene û çarçewaya xebatan de têduştîyê cinsî ser o atolyeyêk ame amadekerdene. Camêrdê ke tewrê xebatê atolye bî hîs û fikrê xo ardî ziwan û bale antî serê girîngîyê rîbirîmendişê zîhnîyetê camêrdan.

	 

	'Fehmê ke tena camêrd eşkeno sîyaset bikero...'

	 

	Endamê Meclîsê Ciwanan ê Partîya Demokratîke ya Şaran (HDP) û endamê Heyetê Îdarekarê Merkezî Omer Gungor, tewrê atolyeyan bibi û va: "Atolye de serê şîdetê hemverê cinîyan û şîdetê mîyanê keyeyî ame munaqeşekerdene. Munaqeşe de ma dî ke camêrdî mîyanê babete de zaf qels ê. Ma dî ke astengîyê tewr pîl myê hemverê cinîyan, camêrd ê û camêrdî nêverdenê ke cinî tewrê wareyê sîyasetî bibê. Mîyanê keyeyî de karbeşî çin o û pêro karê keyeyî serê milê cinîyan de yo. Hema zî nêzdîbîyayîşê ma yê feodal esyo. Hema zî fehmê tena camêrd eşkeno sîyaset bikero esto. Labelê mi atolye de vîna ke embazê ma yê cinî zî feodal nêzdî çîyan benê."

	 

	'Tesîrê feodalî serê ma de esto'

	 

	Îdarekarê HDPyî yê qezaya Konakê Îzmîrî Mehmet Saît Balci tewrê atolye bibi û bale ant serê nêzdîbîyayîşê feodal û wina va: "Nêzdîbîyayîşê feodal hema zî bi tesîr o. Mi nê çî atolye de ferq kerd. Cinî tewr zêde kede dana la camêrd yeno vînayene. Nêzdîbîyayîşê cinî ganî hetê camêrdan ra hîna zî aver o. Ma munaqeşeyê atoleye de dî ke têkoşîno esas cinî kenê."

	 

	'Dayîk û pî ney dewlete cîyayî kena'

	 

	Kenan Biçer hemserekê HDPyî yê qezaya Bornovayî yo û dîyar kerd ke atolye de serê modernîteyê kapîtalist de munaqeşe ameyê kerdene û wina va: "Modernîteyê kapîtalistî de problemo esas camêrd o û tewr zêde serê ‘kiştişê camêrdî' kûr bî. Sîstemo ke cinî sey mulk vîneno, camêrdan zî sey mulk vîneno. Nika Tirkîya de kaosêk pîl ê sîyasî esto. Îqtîdar Tirkîya ver bi çinkerdişî beno. Cinî bi nameyê, 'Ma xo pawenê' xo birêxistin kenê. Şîdetê hemverê cinîyan para camêrdan xeylê zêde ya û ganî camêrdî na babete ser o bêrê perwerdekerdene. Demo ke laj yeno dinya, dayîk, pî û dewlete cîyayî kenê. Dewlete teda camêrdî kena û camêrdî  zî teda cinî keno. ganî kampanya ke ameya destpêkerdene her cayê Tirkîya de aver berê."

	 

	'Hemkarîya hempar do senîn aver şêro?'

	 

	Hemsereka HDPyî ya qezaya Bornovayî Aysel Gezgîncî zî bale ant serê têduştîyê mabêne cinî û camêrdan û va: "Hêzê cinîyan esto ke xo bipawo la tena ganî ferqê hêzê xo de bê. Xebatê atolyeyê ke cinî û camêrdî pîya tewr benê de camêrdî serdestî kenê. Çend vatişanê xo de qalê têduştîyê cinî û camêrdan bikerê zî her wext mîsyonê 'komkerdişî' danê cinîyan. La cuya xo rojane de zî vatişanê xo pratîze nêkenê. Eke cinî şêro perwerde zî sebebê sey, 'Kam' do werd virazno û domanan wey bikero vejenê vernî. Yan zî vanê, 'Cinîya mi şêro partî, domanî do se bikerê û werd do senîn bêro viraştene' demo ke nêzdîbîyayîşêk winasî bibo, hemkarîya hempar do senîn biba."

	 

	'Ganî xebatê winasî her cayê Tirkîya de bêrê dayene'

	 

	Aysele tewr peyîn wina va: "Camêrdî bi vatişê, 'Eke cinî, cinî bo camêrdê wina do pîl nêkero' xo pawenê. Ma peynîya atolye de vîna ke camêrdê demokratî bi vatişê, 'Sûce ma nîyo, ma mîyanê sîstemî de wina ameyî pîlkerdene' rexneyê xo danê. Camêrdî vurnayîşêk wazenê la reyna zî bendeyê cinî manenê. Cinî her wext mîyanê têkoşînî de ya û ma wazenê ke xebatê bi nê rengî her cayê Tirkîya bêrê dayene. Hetê muhtewa de beno ke bêro xurtkerdene û babetê sey şîdetê mîyanê keye de û pîlkerdişê domanan eşkenê ci rê zêde bikerê."