‘Baxçeyê Hewselî nînê pakkerdene’ 2020-10-29 14:35:02   AMED - Baxçeyê Hewselî ke sey ‘cîgerê şaristanî’ yenê binamekerdene û mîyanê Lîsteyê Mîrasê Dinya ya ÛNESCOyî de yê, bi şewat, çop û birnayîşê daran yenê texrîpkerdene.   Baxçeyê Hewselî yê ke wayîrê tarîxêk 8 hezar serrî yê, qandê 700 hektar Geliya Dîcle ke keweno başûrê rojhelatê Amedî, hem wayîrê cayê zergûnayî, bi dar û çimeyê cuye  hem zî bîyê yew sembolê Amedî. Baxçeyê Hevselê ke hetê dewlemendîyê tarîxî, kultur û xoza zî cayêk girîng gênê, mabêne Sûrê Amedî û Gelîya Dîcle de wayîrê herrêk feydeyîn ê. Xeylê welatîyê Hevselî debara xo bi ramitişê sebzeyan kenê.   ‘Tewirê çûçikan zirar vînenê’   Baxçeyê Hevselî ke sey ‘cîgerê şaristanî’ yenê binamekerdene û mîyanê Lîsteyê Mîrasê Dinya ya ÛNESCOyî de ca gênê, bi şewat, çop û birnayîşê daran yenê texrîpkerdene. Xeylê rey Hewsel de şewat virazîya û bi no hawa bi desan darê sipîndar û fêkiyan zirar dî. Sewbîna taybetîyêk bîn ê Hewselî esto ke no zî cayê çûçikan ê nêzdîyê se tewirê çûçikan tîya estê. Hewsel sey Cinetê Çûçikan yeno zanayene. La çi heyf, bi nê şewat, çop û xurdeyan nê çûçikî zî zirar vînenê. Baxçeyê hewselî ke derûdorê ci pirrî çop esto, pak nêkenê.   ‘Ne yeno pakkerdene û ne zî yeno pawêtene’   Eynî wextî de welatîyê hewselî dîyar kerdî ke lûleyê kanalizasyon ke serê hewselî ra derbaz benê ra aciz ê. Nê borî boyêk nêweş kenê baxçe û awanê lêşin heriknenê mîyanê baxçe. Sewbîna welatîyê Hewselî bêwayîrvejîyayîşî zî ra gerrekerdox ê. Seba ke nîno pawitene, tîya xeylêk rey şewat vejîyayo. Hewsel ke wayîrê mîrasêk pîl o, bi talankerdişî reyde rî bi rî yo. Pêwa reaksîyonê ekolojist û derdorpawitoxan Hewsel nîno pawitene û pakkerdene.