'Bi rijnayîşê keyeyan wazenê ma bikerê deyndarê dewlete' 

2020-10-27 13:35:24


	 

	 

	AMED - Welatîyê ke taxa Kaynartepeyî de ciwîyenê, reaksîyon vera vurnayîşê şaristanî dayî û vatî: "Bi projeyanê xo wazenê ke tîya bikerê sey Sûr, la ma çîyêk winasî rê destûr nêdanê. Bi rijnayîşê keyeyan dir wazenê ke ma bikerê deyndarê dewlete."

	 

	Serekkomarî bi qerarnameyê xo dîyar kerd ke taxa Kaynartepe ya girêdayê qezaya Rezanê Amedî, wareyêk 53 donim seke wareyê bi rîsk o û ganî uca de vurnayîşê şaristanî bi ca bêro. No ca sey cayo tewr kan ê qezaya Rezanî yeno zanayene. Bi hezaran welatî tîya ciwîyenê. Etapo 1in de ke do bibo wareyê vurnayîşê şaristanî 337 awanî û hezar û 354 keye estê. Tîya cayê ke wazenê bi vurnê, 7 hezar merdimî ciwîyenê. Qerarnameyê Serekkomarî de rojnameyo fermî yê dewlete de ame weşankerdene. Dimayê qerarî, taxe de dest bi rijnayîşê awanîyan ame kerdene. Welatîyê ke taxa Kaynartepe de ciwîyenê, reaksîyon vera projeyî dayî û fikrê xo ajansê ma rê qal kerdî.

	 

	'Ma tersenê ke tîya zî bibo sey Sûr'

	 

	Aynûr Eskîcî ke taxa Kaynartepe de ciwîyena va ke bi endîşeyîn ê ke do Rezan zî bibo sey Sûr û qiseykerdişê xo wina dewam kerd: "Eke keyeyanê ma birijnê û kîrayê ma nêdê, ma do keyanê xo ra nêvejîyê. Xora îmkanê ma çinê ke ma bikewê keyeyêk newe. Nika ma zî bi endîşeyîn ê ke senî bikerê. Bawerîya ma înan ra çin a, coka ma tersenê bi no proje ma mexdûr bibê."

	 

	'Ma nêwazenê mexdûr bibê'

	 

	Hayrîye Aslan zî va ke ê nêwazenê mexdûr bibê û va: "Xor ama krîzê ekonomî ra ma nêeşkenê kira û fatureyê xo bidê. Nika zî eke keyeyanê ma xira bikerê, ma do se bikerê. Bi sebebê awanîyê newe do welatîyê tîya ciwîyenê, bikerê rewşêka xirab. Ma tersenê ke bikewê mîyanê krîzêk bîn."

	 

	'Peynîya ma dîyar nîya'

	 

	Hasîbe Almaz zî va ke peynîya înan dîyar nîya û wina va: "Ez înan ra bawer nêkena. Eke keyeyê ma birijnê ma do şêrê ça. Eke keyeyêk newe bidê ma zî do vay bidê ma. Ma peynîya xo fikrîyenê. Nika welatîyê tîya bi keyeyanê neweyan xapênenê. Sewbîna eke umîdêk winasî danê şarî çira krîzêk pîl de yê? Ma çira nêeşkenê debara xo bikerê û faturyanê xo bidê? Bi projeyê xo tîya wazenê ke sey Sûrî bikerê, la ma do nêverdê. Keyeyê Sûrijan zî rijnayî û înan kerdî deyndarê dewlete. Coka ez nêwazena keyeyanê ma birijnê. Dewlete hetkarîya înan nêkerdebî. Beno ke tîya zî eynî çî bêro meydan."

	 

	'Rijnayîşê keyeyan ma tersneno'

	 

	Halîme Taşkiran zî va ê nêwazenê  projeyê vurnayîşî bêro kerdene û wina va: "Xora şarê ma mîyanê krîz de yo û seba viraştişê debara xo fikrîyenê. Nika zî projeyêk wina ardê vernîya ma û şarê ma nêrazîbîyayîşî xo anê ziwan. Eke keyeyê ma birijnê ma perîşan benê. Rewşa ma zî çin a ke ma bikewê keyeyêk newe. Ma hema nêeşkenê kirayê xo bidê, nika zî rijnayîşê keyeyan ma tersneno."