‘Ma bazar ra deyndar agêrenê’ 

2020-10-24 15:09:45


	 

	WAN - Cinîyê ke bazarê Wanî de dayîşûgirewtiş kenê vayî û krîzê ekonomî ra gerrekerdoxê û vatî: "Ma bi 100 TL yenê bazar la ma deyndar agêrênê keyeyê xo. Ma nêeşkenê waştişê domananê xo bi ca bîyarê û ma nêeşkenê karêk bîn bikerê. Hukmat vano ke rewşa ekonomî baş a, eke baş bo na çi rewş a?”

	 

	Welat de krîzê ekonomî her roje derbaz beno û tewr zêde beno. Dimayê şube xora zêdeyêr bi. Bêkarî û vayî êdî welatî nêeşkenê debara xo ya rojane bikerê. Bazarê Dişemî ke taxa Sixkêyê Rayîrê Armûşî ya Wanî cinî goreyê debara xo wazenê dayîşûgirewtiş bikerê. Cinîyê ke ajansê ma rê qisey kerdî, vayîyê sebzeyan ra gerrekerdoxê û vatî ma bi 100 TL yenê la ma deyndar şinê keyeyê xo.

	 

	‘Ez nêeşkena waştişê domananê xo bi ca bîyarî’

	 

	Muşerref Çelik, dîyar kerd ke heta nika bi 100 TL eşkenê bigîrê la nika deyndar şinê keye û wina va: "Nika çîyêk nîno girewtene. Vayîyê sebzeyan zaf zêde yo. Ma keye de 6 kesî yê tena keaêk ra pere yeno. 3 domanê mi zî şinê mektebe. Ma se bikerê zî ma nêeşkenê debara xo bikerê. Ma çîyê tewr erjan gênê. Gama ke ez bazar ra agêrena û yena keye domanê mi kewenê pey mi û çîyan wazenê. Gama ke ez waştişê domananê xo bi ca nêana ez zaf xemgin bena. Seba goştê dewaran zaf luksno û goştê kergan gêna.”

	 

	‘Ma nêeşkenê debara xo bikerê’

	 

	Seher Armali, dîyar kerd ke bi her hawa problemê ekonomî ciwîyenê û va: “Ma di kes ê, la seba krîzê ekonomî ma mecbûrê ke xeylê çîyan nêgîrê. Ma nêeşkenê debara xo bikerê. La ez fikrîyenê ke keyeyê qelebalîxî se kenê. Seba ke heme çî zaf vayo û êdî qîymetê pereyî nêmendo. Nika bazar de her kesêk eynî çî ciwîyeno. Ma wazenê ke krîzê ekonomî bêro çareserkerdene û heqdestê karker û kedkaran bêro zêdekerdene." 

	 

	‘Ez nêeşkena tedawîyê domananê xo bikerê’

	 

	Rahîme Beyduz, dayîka 6 domanan a û wina va: "Nika mi tena seba pitika xo cilêke girewt. Mi bi 20 TL girewt la seba mi zaf vayo. Seba krîzê ekonomî ma nêeşkenê debara xo bikerê. Sewbîna domanêk mi nêweşîya qelbî esto. Ez seba hetkarî waştişname dana cayê eleqedar la cewabêk nêdanê mi. 4 domanê mi şinê mektebe la keye de kompîtûr û înternet çin o. Keyeyo ke ez tede ciwîyena zî bi rutubet o û o zî beno sebebê nêweşîyan.”

	 

	‘Eke rewşa ekonomî baş bo çira hende kes bêkar o’

	 

	Refîka Kurt qiseykerdişê xo de bale ant serê zêdebîyayîşê hûmara bêkarî û va: "Welat de her roja ke derbaz beno hûmara bêkarî zêde bena. Çend hukmat vano ke rewşa ekonomî welat de baş o zî la rastîyê xo de wina nîyo. Eke rewşa ekonomî baş ba çira hende kesî bêkar ê. Mi xeylê rey muracatê ÎŞKURî da la heta nika tu cewabêk nêameyo dayene. Ez dorê laçikan neqş kena û roşena. Ez laçike bi 12 TL gêna û bi 25 TL roşena. Mi rê tena 7 TL maneno. Gelo ez o se bikerî? Nê welatî de seba kesêk/e paştdayîşêk esto û nê kesî qet mexdûr nêbenê.”