‘Seba xopawitişî ma kuçe kuçe geyrenê’ 

2020-10-24 14:15:31


	 

	Medya Uren 

	 

	MÊRDÎN  - Mêrdîn de çalakwanê TJAyî kuçe bi kuçe geyrenê û qalê kampanyaya xo, "Ma xo pawenê” kenê. Çalekwana TJAyî Alîye Tok dîyar kerd ke Mêrdîn de kiştiş û merdişê cinîyan ê bi guman zêde beno û wina va: "Ma do kiştiş û şîdetê hemverê cinîyan xo bi rêxistin bikerê û bipawê." 

	 

	Demê peyîn de Mêrdîn de hedîseyê hêrişê cinsî, şîdet û kiştişê cinîyan resayo sewîyeya tewr cor. Hemverê kiştiş û şîdetê cinîyan heta ewro tu gamêk nêameyo eştene. Serbestveradayîşê û ceza nêgirewtişê hêrişkar û tecawuzkaran beno sebebê şîdet û kiştişê cinîyan. Tevgerê Cinîyê Azadî (TJA) hemverê polîtîkayê taybet yê şer û şîdetî bi nameyê, "Ma xo pawenê” kampanyayêke da destpêkerdene. Kampanyaya cinîyan Mêrdîn de bi xebate û çalakîyê cîya yenê kerdene. Aktîvîstê TJAyî kuçe bi kuçe geyrenê û xo resnenê cinîyan û vengdayîşê xo yê pawitişî kenê. Derheqê babete de çalekwana TJAyî Alîye Tok ajansê ma rê qisey kerd.

	 

	‘Mîyanê 5 mengan de 10 cinî dinyaya xo bedilnayî’

	 

	Alîye destpêkê qiseykerdişê xo de bale ante serê cinîyê ke dinyaya xo bedilnayî û va: "Mêrdîn de mîyanê 5 mengan de 10 cinî bi hawayêk guman dinyaya xo bedilnayî. Nê çî netîceyê polîtîkayê îqtidarî de vejênê werte. Amancê înan çinkerdişê exlaqê komelî yo. Nê dejenerasyonî de parê îqtîdarê AKP- MHPyî xeylê zêde yo. Bi taybet zî demê peyîn de çawiş û polîsî binê nameyê heskerdişî de cinîyê kurdan xapênenê û desteştiş kenê. Netîceyê nê de peynîya cuya xo anê. Mîyanê 5 mengan de 10 cinî dinyaya xo bedilnayî, labelê hûmare hîna zêde ya. Hedîseyê wina yenê nimtene. Hemverê nînan xebatê ma estê. Yew ci ra zî kampanyaya ‘Ma xo pawenê’ ê TJAyî ya.”

	 

	‘Ma do xo bi rêxistin bikerê û bipawê’

	 

	Alîye, dîyar kerd ke hemverê şîdetî xebatê ma estê û wina va: “Hemverê heme tewir şîdetê ma kampanyaya 'Ma xo pawenê’ da destpêkerdene. Çarçewaya nê de ma kuçe kuçe geyrenê û xo resnenê cinîyan. Ma do polîtîkayê lêşin ê îqtîdarî heme kesî ra vajê. Ma do hemverê nê vindertişê xo ramojnê. Ma cinî ma do pîya xo bipawê. Ma do xozaya xo, tarîxê xo û cografyaya xo bipawê. Ma do seba nê zî şewe û roje bixebityê. Ma do xo bipawê.”