'Tecrîdê serê Abdullah Ocalanî tecrîdê serê şarê Kurdî yo' 

2020-10-23 15:20:07


	 

	AMED - Cinîyan tecrîdê serê Raberê PKKyî Abdullah Ocalanî şermezar kerdî û vatî: "Şexsê Abdullah Ocalanî de şarê Kurdî yeno tecrîdkerdene. Abdullah Ocalanî toxêmi aştî, yewî û têduştî eşto û ma do no tecrîdî bişiknê."

	 

	Hemverê Rayberê PKKyî Abdullah Ocalanî bi 22 serrî yo, tecrîdêk esto. Pêvînayîşê keye û avûkatê ey bi sebebê cîya yenê astengkerdene. Cinîyê Amedijî tecrîdê serê Rayberê PKKyî Abdullah Ocalanî şermezar kerdî û vengdayîşê aştî kerdî.

	 

	'Serek Apo toximê aştî, yewîye û têduştî eşto'

	 

	Muşeher Ulker, destpêkê qiseykerdişê xo de tecrîdê serê Rayberê PKKyî Abdullah Ocalanî şermezar kerd û va: "Ewro serek bi 22 serrî yo mîyanê 4 dêsan de yo, bi no hawa bi mîlyonan kurdî zî mîyanê 4 dêsan de yo. Wa heme şarê Kurdî baş bizano ke tecrîd serê ma hemine de yo. Heta serek azad nêbo 40 mîlyon kurdî zî azad nîyo. Serek Apo toximê aştî, yewî û têduştî eşto. Dewleta tirkî tecrîdê serê serekîye 4 rey zî tewr giran bikero, ma do tecrîdo gemarî bi xoverdayîş biqedênê û Rayberê Şarê Kurdî azad bikerê. Ma cinî û sey dayîkê şehîdan destê xo bidê yewbînan, ma do nê tecrîdî bişiknê. Wexto ke avûkatî seba pêvînayîşê  Serek Ocalanî muracatê dadgehe kenî, her wext bi sebebêk cîya muracat betal kenê. No vernîgirewtişê muracatan yeno manaya înkar û îmhayê îradeyê şarê kurdî. Kilîtê aştîye grava Îmralî de yo."

	 

	'Wa tecrîd bêro şiknayene'

	 

	Asîye Şîmşek, bale ante serê tecrîdê Rayberê PKKyî Abdullah Ocalanî ke zirar dano pêro şarê Tirkîya û wina va: "Xeylê merdimî felsefeyê Serek Ocalanî parêk xo rê wedarnayê. Ez sey cinîyêke wazena tecrîd bêro şiknayene û her kes serê herra xo de mîyanê aştî û hizur de biciwîyo. No tecrîdê serê Rêber Apoyî, heqaretê serê şarê Kurdî yo. No tecrîd sûcê merdimayî yo."

	 

	'Dewlete kede û berardişê cinîyan wazeno tecrîd bikero' 

	 

	Hemsereka Partîya Herêma Demokratîke (DBP) a şaristanê Amedî Sevale Gulmez wina va: "Dewlete bi tecrîdê Rayber Apoyî wazena ke cinîyan zî bikera binê tecrîdî û cinî heqîqet ra dûr bifîna. Bi tecrîdî reyde şerê taybet dayî destpêkerdene. Reyna zî hedefê ewil de cinîyê Kurdî yê. Birêz Ocalan bi 22 serrî yo mîyanê tecrîdêk giran de yo. Dinya xo hemverê nê tecrîdî kena ker û lal. Ez sey cinîyêke nê tecrîdî şermezar kena. Cinî do wareyan de seba qedînayîşê tecrîdî vengê xo berz bikerê, xo ver bidê û xo birêxistin bikerê. Ê do cinî û şarî serkewte bê."