Bi keda destê cinîyan dims yeno serê sifreyan 

2020-10-23 13:55:55


	 

	Rojda Aydin 

	 

	
		ŞIRNEX - Dimayê ke hamnanî qedêno, cinî engurê ke rezan ra arêdanê, ci ra dims, bastêq û meşlûlan viraznenê. Herêma Hêneyê Sîya ê Şirnexî de cinîyê ke engure arêdanê û kenê dims dîyar kenê ke seba viraştişê dimsî kedêk pîl lazim o, la ê kom benê û pîya kar kenê û wina karê xo hîna asan kenê.
	
		 


	Herêma Hêneyê Sîya ê Şirnexî de viraştişê dimsî bi ameyîşê payîzî reyde dest pêkeno. Cinîyê ke kulturê dimsî heta roja ewro ardê, bi hawayêk komînal xebatanê xo kenê. Dimso ke bi destê cinîyan yeno viraştene û heme nêweşîyan rê derman o. Ma zî seba ke bi resê, no kar senîn yeno kerdene ma verê kamerayanê xo da keda cinîyan û dimso ke yeno viraştene.

	 

	Gulîstan Varinç (37) dîyar kerd ke ê serê sibayî rew aya benê û va ke no kar hîna zaf cinî kenê û va: "Viraştişê dimsî bi taybetî bi destê cinîyan yeno viraştene. Camêrdî tena wextê arêdayîşê engure de û pelçiqnayîş de benê hetkar. La dima ra pêro kar ma kenê û heta ma dimsê xo benê keye. Seke yeno zanayene, dims xeylê nêweşîyan rê derman o û ma bi hawayêk xoza dimsê xo viraznenê."

	 

	'No dims dimsê bînan ra vayêr o'

	 

	Gulîstane, dîyar kerd ke dimso ke ê viraznenê ê bînan ra vayêr o û va: "Ma dimsê xo ra tewirê engure yê qitilnefs viraznenê û xeylê nêweşîyan rê baş yeno. Seba qalîtayê engure ma baş o, dimsê bînan ra vayî yo. Ma serê sibayî şinê mîyanê rezî. Ma engure xo arêdanê û dima ra hîn herre û welî erzenê ser û ma pelçiqnenê. Welî seba ke rengê dimsî zelal bibo ma kenê ci. Herre zî seba tirşbîyayîşê ci kenê ci."

	 

	'Ma dims ra xeylê tewir şîrînayî viraznenê'

	 

	Gulîstane dima ra wina qalî kerd: "Ma sere de şîreyê xo gêrnenê û danê hetêk ke zelal bibo. Dimayê ke zelal bi reya diyîn ma reyna girnenê û heta bêro hemdê xo girnenê. Ma zaf çîyan viraznenê. Gama ke me şîre viraznenê ma gozan zî kenê ci û no zî tena herêma Şirnexî de yeno viraştene. Dims seba xeylê nêweşîyan baş o. HEm seba serdî û hem zî dejê qirike rê baş o. Ma bi taybetî zimistanî danê domananê xo."

	 

	'10 kîlo engure ra kîloyêk dims vejêno' 

	 

	Behîye Algûl (40) zî dîyar kerd ke ê di rojan bêmabên dims viraznenê û wina va: "Ma kedêke zaf pîl danê. Rastî zî viraştişê dimsî zaf zehmet o. Dimso ke ma viraznenê, dimsê bînan ra cîya yo. Karê ma zehmet o la ma bi heskerdiş kenê. Seba ke karêk zehmet o, ma cinî mîyanê xo de kar pare kenê. Dimayê ke karê ma qedêno, ma şinê hetkarîya yewa bîn. 10 kîlo engure ra kîloyêk dims vejêno."