Cinî bi qirş û qalê ke arêdanê zimistan derbaz kenê 

2020-10-23 13:25:29


	 

	MÊRDÎN - Gelîya Awa Sipîye de seba ke zimistan xidar derbaz beno, cinî nika ra amadekarî kenê. Cinîyê ke amadekarîya zimistanî kenê, qirş û qalê ke arêdanê, seba zimistanî wedarnenê.

	 

	Dimayê ke hamnan derbaz beno, cinî seba zimistanî kewenê mîyanê tevger. Her herêmêke goreyê xo dest bi amadekarîyê zimistanî kena. Hîn bi fêkî û sebzeyê ke wişk kenê, hîn înan ra tirşî, bastêq û konserveyê ke viraznenê amadekarîyê zimistanî kenê. Pêwa nê heme çîyan problemêk zimistanî yê germbîyayîşî esto. Seba nê zî bi taybetî dewan de cinî kewenê mîyanê tevger û qirş û qalê ke arêdanê semedê zimistanî wedarnenê. Xecê Yidirim, derheqê babete de ma rê ercnayîş kerd.

	 

	'Xebatê ma bi rojan dewam kenê'

	 

	Xecê Yildirim, gelîya Awa Sipî de wayîrê lokonta ya û eynî wextî de percînan arêdana. Xecê derheqê xebata xo de wina va: "Ma her wext sipîndaran arêdanê. Dimayê ke 6 - 7 serrê înan qedênê zî, seba ke êdî nêbenê pîl, ma birnenê û vera înan newe ra daran danê ro. No bi hawayêk sîstematîk yeno kerdene. Ma zimistanî bi nê daran û qirş û qanê înan derbaz kenê. Dimayê ke ma karê xo qedênenê zî ma newe ra dest bi şitlanê înan kenê. Na xebata ma bi rojan dewam kena."

	 

	'Keda pîl cinî danê'

	 

	Xecê wina dewam kerd: "Cinî eynî karan de kedêk pîl danê. Nê karê ke nika ez qal kena zî beno ke teber ra zaf asan biasîyo, la wina nîyo. Ma qirşû qalê nê daran yew bi yew arêdanê. Xeylê merdimî zî bi rotişê înan debara xo kenê. La seba ke zimistanê ma xidar o, ma xebitnenê. Nika nê karî xeylê xo cinî kenê. Ma nê qirş û qalan arêdanê, kenê paşta xo û benê keye. Ma înan hem seba pewtişê nan û hem zî zimistanî seba ke ma xo bi înan germ bikerê erzenê soba. Nê qirş û qalî bi her hawayî qîmê ma yenê."