Mexdûrê erdlerzî wazenê ke vengê xo bidê eşnawitene 2020-10-22 15:32:09   Hikmet Tunç   WAN - Serê erdlerzê Wanî yê pîlî ra 9 serrî derbaz bi. Labelê welatîyê Wanî yê ke konteyniran de ciwîyenê, hema zî yenê mexdûrkerdene. Welatîyê ke konteynirê bê awe û ceyranî de manenê, wazenê ke vengê înan bêro eşnawitene.   9 serrî erdlerzê 23yê teşrîna verêne 2011 de bi pîlbîyayîşê 7.1 Wanî ser o derbaz bi. Goreyê hûmaranê fermî 604 kesî dinyaya xo bedilnaye, 4 hezar û 152 kesî zî birîndar bî. Xeylê awanî rijyayî, xisar dî. Dimayê erdlerzê Wanî koçberîyêk pîl dest pêkerd.   Şar çadiran de ciwîya   Xeylê kesî seba demêk derg çadiran de ciwîyayî. Welatîyê ke serd û seqemê Serhedî de mecbûr mendî çadiran de bimanê, seba germ bibê soba dayî ro. Coka 12 kes zî şewat ra dinyaya xo bedilnayî.   Hukmatî erdlerz xo rê açerna firset   Xeylê lazimîyê welatîyê ke çadiran de bi ca bî nêameyî bicaardêne. Dima ra welatî TOKÎyan de ameyî bicakerdene. Nê keyeyan bi deyn dayî welatîyan. Hukmat erdlerz xo rê açerna firset û welatî binê deynd verdayî. Binge û hacetê TOKÎ seba ke zexm nêbî bî sebebê probleman.   ‘Ez wazena ke êdî sey însanan biciwîyî’   Hizret Durana ke konteynir de ciwîyena, verê erdlerzî kîra de bîya û dimayê erdlerzî demêk derg çadire de menda û dima ra zî konteynir de menda wina va: “Seba şertê zor, ez bi xeylê nêweşîyan kewta. Mêrdeyê mi nêweşîyê ey giran a û ez zî nêweş a şekirî ya. Tansîyonê mi esto û lingê mi masenê. Ez wazena êdî sey însanan biciwîyî. Tena waştişê mi oyo ke keyeyêk mi virazyo.”   ‘Seba ma sereyê xo bişoyî ma şinê verê merdimanê xo’   Konteyniran de problemê ceyran û awe rî dano Adilşahe Demirhan zî dîyar kerd ke seba nê probleman, ê mîyanê rewşêk zehmet de yê û wina va: "Xeylê keyeyî seba pakiti şinê verê merdimanê xo. Ez nêweşa guatirî ya. Ez seba sereyê xo bişoyî şina verê merdimanê xo. Hela bêrê konteynirê ke ez tede manena biewnê şima eşkenê saetek zî tede biciwîyê? No new serrî yo ma tîya yê. Wa êdî vengê ma bêro eşnawitiş.”   ‘Zimistanî zî hamnanî zî ma mexdûr benê’   Ayşe Akdemîr zî wina va: "Ma di kes tîya ciwîyenê. Zimistanî konteyniran de ciwîyayîş derdêk o û hamnanî derdek o. Ma her serre 7-8 mengî bêceyran derbaz kenê. Ma bi meterayan awe danê verê tîjî û ma wina ser û cilanê xo şonê. Hîn konteyniran de 7-8 kesî manenê. Domanê ke şinê mekteban zî mexdûr benê.”