Kooperatîfê Cinîyan ê Licê eleqeyêk pîl vîneno 2020-10-22 14:40:14   AMED - Kooperatîfê Cinîyan ê Licê ke seba xeylê cinîyê kedkaran bi wareyê îstîhdamî, xebatê ci dewam kenê. Sereka Kooperatîfê Cinîyan ê Lîcê Leylan Karakeçî va, berardişê ke viraznenê, destê înan de nêmanenê û kooperatîf eleqeyêk pîl vîneno. Sewbîna Leylane dîyar kerd ke ê seba ke xo tewr zêde biresnê cinîyan, bendeyê hetkarî yê.   Kooperatîfê Cinîyan ê Licê ke serra 2019 de hetê hewt cinîyê kedkarê keyeyî ame akerdene, seba xeylê cinîyan bi wareyê îstihdamî. Detpêkê akerdişê kooparatîfî de cinîyan bi sebzeyê ke wişk kerdî, viraştişê salçe û turşî, rîçal, îsotan û qorme dest bi kar kerdibî. Cinîyan dima ra wareyê tekstîl û berardişê şit û penîr de zî xebatan kerdî û ewro bererdaşê înan teberê welatî ra zî yeno waştene. Sereka Kooperatîfê Cinîyan ê Licêyî Leylane Karakeçî derheqê karê xo de zanayîş da.   ‘Teberê welatî ra waştiş zêde yo’   Leylane Karakeçî dîyar kerd ke xeylê berardişê ke viraznenê erşawenê teberê welatî û va: “Wexto ke ma newe dest bi xebate kerd ma 7 cinî bî. La ma nika 25 cinî kooperatîf de xebityenê. Rastî zî na babete ma kêfweş kena. Ma dimayê wişk kerdişê zebze, dest bi berardişê cil û belgan zî akerd. Nika seba ke şit kêm o, ma nêeşkenê kooparatîf de beşê penîr bidê xebitnayene. La dimayê mengêk ma do uca zî bidê xebitnayene. Ma nika atolyeya cil û belgan danê xebitnayene, sebze wişk kenê, turşî viraznenê û sewbîna ma pincar zî kenê wişk. Seba berardişanê ma teberê welatî ra waştiş zêde yo û ma tewr zêde berardişanê xo erşawenê teberê welat.”   ‘Ma bendeyê paştdayîşî yê’   Leylane va ke înan texmîn nêkerdêne tewrbîyayîşêk hende xurt bibo û wina va: “Xora amancê ma yo sereyîn oyo ke ma cinîyan rê wareyê îstîhdamî abikerê, tewr cinî xo biresnê ma û bieşkê bi keda xo debara xo bikerê. Xora cinîyê ke xebityenê vanê, ‘başo ke no ca abîyo û ma zî zereyê keyeyî ra vejîyayê. Eleqeyê cinîyan hêz dano ma ke ma tewr zêde xebityene.”   ‘Atolyeya cil û belgan de 12 cinî xebityene’   Alîye Tekîn zî atolyeya cil û belgan de xebityena û nêzdîyê 3 mengî tewrê Kooperatîfî bîyê û wina va: “12 kedkarê ma estê. Demo ke atolye ameye akerdene ma destpêk de çante derznayî. Dimayê prosesê pandemî dest pêkerd ma deştişê maskeyan kenê û karê xo dewam kenê. Mi bi hetkarîya nasanê xo tîya dî û mi waşt bixebityî. Seba ke lazimîyê mi bi. Serê siba saete 8 ra heta 5ê şan de xebityena. Gama ke sîparîş bibo larê ma zaf baş o. La eke çinbo ma mecbûrî cayê xo de vindenê. Ma wazenê karê ma tewr zêde bibo ke cinî bieşkê tewr zêde bixebityê. Ganî dewamê Kooperatîfan bêro ke cinî bieşkê debara xo bikerê.”