
Kongreya 8in ya Kongreya Starî de qerarê muhîmî ameyî girewtene

2020-10-21 13:15:41


	&nbsp;

	QAMIŞLO - Kongreya Pêroyî ya 8in ya Kongreya Starî Rojawanî ke bi sloganê, ”Bi têkoşînê Hevrîne û Zehrayan ma do îşxalkerdiş biqedênê û şorişê cinîyan bîyarê ca” amebi organîzekerdene, bi qerarê muhîman peynî bi.

	&nbsp;

	Kongreya Starî ya Rojawanî bi şîarê, “Bi têkoşînê Hevrîne û Zehrayan ma do îşxalan biqedînê û şorişê cinîyan bîyarê ca'' kongreya xo ya 8ine viraşte 300 delegeyî kantonanê herême beşdarê kongre bîyî. Wendişê raporê di serran ra dima nîzamnameyê Kongreya Starî ame tesdîqkerdene. Dima 7 temsîlkarî sey endamanê Koordînasyonê Kongreya Starî ya Rojawanî ameyî weçînayene.

	&nbsp;

	Qerarê ke ameyî girewtene wina yê:

	&nbsp;

	*Têkoşînê seba azadîya Rayberê PKKyî Abdullah Ocalanî bi çalakîyan û daşinasnayîşê fikranê ci do bêro berzkerdene.

	&nbsp;

	*Dewaya qetilkerdişê sivîlan do bêrê berdene bi mehkemeyanê mîyanneteweyîyan.

	&nbsp;

	*Kongreya Starî bingeyê têkoşînê xo de jineolojî esas gêna û nê esasî ser o pêro metodê têkoşîn û xoverdayîşî ana ca.

	&nbsp;

	*Komîteya çalakîyan do bêra awankerdene û aktîfkerdene.

	&nbsp;

	*Têkoşînê vera şerê taybetî û sîyasetê qirkerdişê etnîkî do dewam bikero.

	&nbsp;

	*Seba ke meseleyê sey zewijnayîşê domanan û wedaritişê şîdetê vera cinîyan bêrê çareserkerdene çalakîyî do bêrê kerdene.

	&nbsp;

	*Meseleyê koçberan do bi bername û planan bêrê çareserkerdene.

	&nbsp;

	*Seba teqîbê dewayanê DAÎŞî warê dîplomatîkî de komîteyêka huqûqî bêro aktîfkerdene.

	&nbsp;

	*Cinîyê astengdarî bêrê perwerdekerdene, seba pawitişê domanan, caardişê hewcedarîyanê înan û ameyoxê înan planî do bêrê kerdene.

	&nbsp;

	*Projeyê ekonomî seba cinîyan bêrê amadekerdene, kooperatîfan ser o bêro vindartene.

	&nbsp;

	*Cinîyanê Başûrê Kurdîstanî, Lubnan û Ewropa reyde têkilîyî wa bêrê xurtkerdene.

	&nbsp;

	*Buro û temsîlkarîyê neweyî Rojhelatê Mîyanênî de wa bêrê akerdene.

	&nbsp;

	*Komîteya Kultur û Hunerî ya Kongreya Starî vera nîjadperestî, pederşahî, dînperestî têkoşîn bikera û modelê demokrasî, ekolojî, cinîyan pêşkêş bikera.

	&nbsp;

	*Partîyanê sîyasîyan ê cinîyan reyde esasê xeta hîreyîne ser o têkilîyî bêrê xurtkerdene.

	&nbsp;

	Kongreya 8ine ya Kongreya Starî bi sloganê, "Cinî Ciwîyayîş Azadî" peynî bî.

	&nbsp;

	&nbsp;