‘Zîndanê Panosî de rewşe baş nîya!’ 

2020-10-20 13:56:39


	 

	AMED - Endamanê Înîsiyatîfî Mayê Aştîye ya Amedî ra Qudret Eryilmaz, dîyar kerd ke 10 mengî yo seba vîrusê korona nêeşkena şêra serdayîşê lajê xo yê tepişte û va: “Hepsîyê Zîndanê Panosî mîyanê şert û mercê nêbaş de ciwîyenê. Ganî Wezaretê Edaletî berpirsyarîyê xo bi ca bîyaro û probleman çareser bikero.”

	 

	Rewşa zîndananê Tirkîya û herême her wext rojeve de ya. Bi taybetî dimayê vilabîyayîşê vîrusê koronayî (Covîd-19) keyeyê hepsîyan tewr zêde kewtî mîyanê endîşe û tersî. Dimayê vetişê Qanûnê Înfazî bi hezaran hepsîyê edlî serbest ameyî veradayene û hepsîyê sîyasî mergî reyde rî bi rî mendî. Lajê endamê Înîsiyatîfê Mayanê Aştiye ya Amedî ra Qudret Eryilmaz (55) Yakûp Eryilmazo ke 4 serrî yo zîndanê Panosî de tepişte yo. Qudrete rewşa zîndanan ajansê ma rê qal kerd.

	 

	‘Zîndanê Panosî de rewşe baş nîya!’

	 

	Qudrete destpêkê qiseykerdişê xo de bale ant serê rewşa lajê xo yê tepişte Yakûpî û va: “Nameyê lajê mi Yakûp o, bi 4 serrî yo Zîndanê Panosî de yo û zîndan de rewşêke nêweş esto. Lajê mi bi rayîrê telefonî wina va, ‘ma mergî reyde rî bi rî yê. Werdê ma de bismar û kermik vejênê. Beno şan de ma vanê heta siba gelo do çi bîyarê sereyê ma.’”

	 

	‘Bi 200 TL kantîn ra awe gênê’

	 

	Qudrete wina dewam kerd: “Zîndan de awa germ nêdanê hepsîyan û hepsî bi awa cemidnaye sereyê xo şonê. Sewbîna awa lêşine ra bedenê înan hekêno, kul beno û pirzik vejênê. Sewbîna awe ra boya qenalî yena û awe lêşin a. Coka lajê mi roje bi 200 TL  kantînê zîndanî ra awe gêno. Sewbîna hacetê ke ma erşawenê zîndan nêdanê înan û depoyê xo de vindarnenê. Mecbûr verdenê ke hepsî kantîn ra dayîşûgirewtiş bikerê. Çîyê ke kantîn de yenê rotene zî zaf vayê. Seba kantîn ra pere qezenc bikerê wina kenê.”

	 

	‘Wa berê zîndanan abibo’

	 

	Qudrete, dîyar kerd ke bi hezaran kesî seba fikr û fehmê xo tepişte yê û seba vîrusê koronayî zî cuya înan tehluke de ya. Qudret wina veng da mayan: “Ez veng dana heme mayan ke wa wayîrê domananê xo vejîyê. Kezaba mi veşa û ez nêwazena kezeba tu mayêke biveşo. Wa êdî çareserîyêk bêro vînayene, vernîya na gonî bêra girewtene. Wa berê zîndanan abibê.”

	 

	‘Dadgehe bêhuqûqî pawena’

	 

	Qudrete tewr peyîn qiseykerdişê xo de qalê cigêrayîşê xo yê edaletî kerd: “Derheqê îhlalkerdişê Zîndanê Panosî de yenê meydan de ma muracatê dadgehe kerd û ma reaksîyonê xo ard ziwan labelê heta nika ma tu netîce nêgirewt. No çî ramojneno ke dadgehe bêhuqûqî pawena.”