Cinîyê Amediyîjî: Wa Musa Orhan bêro tepiştene 

2020-10-19 14:47:46


	 

	AMED - Cinîyê Amediyîjî dîyar kerdî ke muhakemekerdişê Musa Orhano ke teber de yo qerarêk çewt o û vatî: "Ma êdî tersenê ke vejîyê teber, ganî Musa Orhan û kêsê sey ey bêrê tepiştene.”

	 

	Roniştişê yewin ê dewaya çawîşo pispor Musa Orhan ke Qubînê Êlihî de tecawuzê Îpek Er kerd û bi sebebê mergê aye, 16ê teşrîna verêne 1in Dadgeha Cezaya Giran ya Sêrtî de ame vînayene. Musa Orhano ke teber de yeno muhakemekerdene bi rayîrê SEGBÎSî tewrê roniştişî bi, "heqê xo yê bêvengî” xebitna û dadgehe zî derheqê ey de qerarê teber de bêro muhakemekerdene da.

	 

	Sere de cinî, hetê komelî ra reaksîyonê bi şîdet ameyî ramojnayene.

	 

	‘Ganî cezaya tewr giran bigîro’

	 

	Wendekara unîversîta Rojîn Bîtmîş, qiseykerdişê xo de dîyar kerd ke cinî bê edaletî reyde tesîr bîyê û va ke tepiştişê kesê ke cinîyan pawenê û serbest veradayîşê kesê ke cinîyan qetil kenê nîşaneyê nê bêedaletî yo û va: “Mîyanê ma de verdayîşê kesê sey Musa Orhano tecawizkar tehlukeyêk pîl o û ganî bêro tepiştene. Mendişê ey teberî problemêk tewr pîl o. Ganî bêro tepiştene û bi cezaya tewr giran bêro cezakerdene."

	 

	‘Sebebê ci polîtîkayê dewlete yo’

	 

	Kedkara keyeyî Aysel Koşan zî va, şîdetê serê cinîyan û qetilkerdişê înan roj bi roje zêde beno û sebebê nê zî polîtîkayê dewlete yo. Aysele ard ziwan ke nêtepiştişê Musa Orhanî tehlukeyêk pîl o û va: "Wexto ke ez vejîyena teber tersena. Seba ke asayîşê ma çin o û kesê sey Musa Orhanî mîyanê ma de yê. Ez wazena Musa Orhan û kesê sey ey lez bêrê tepiştene û bi cezaya tewr giran bêrê cezakerdene. Wa heyfê maya Îpeke erd de nêmano. Ganî ma yewîya xo awan bikerê.”

	 

	‘Nê bi zanebîyayîş yenê kerdene’

	 

	Kedkara keyeyî Ayşe Aytun zî va ke serbestmendişê Musa Orhanî şaşîyêk pîl o û seba nê gama ke cinî vejênê kuçe, ganî 3 rey bifikrîyê û wina vejîyê. Aysele wina va: Ganî cinî hemverê nê reaksîyon ramojnê. Tecawuzkarêk mîyanê ma de tehlukeyêk pîl o. Bi zanebîyayîş serbest yenê veradayene.”

	 

	‘Çîyê ke yenê ciwîyayîş polîtîkayê bêcezaverdayîşî yê’

	 

	Wendekara unîversîta Sercan Bîtmîş zî va, hukmat Musa Orhan û kesê sey ey bi zanebîyayîş paweno û va: "Hukmat ke kesê sey Musa Orhan paweno cinîyan zî mahkûmê nê zîhniyetî keno. Seba polîtîkayê bêcezaverdayîşî yê hukmatî hedîseyê bi nê rengî zêde benê. Ez Swîsre de ciwîyena seba demêk ameya tîya, la gama ke vejîyena teber bi endîşeyîn a. Tirkîya seba cinîyan welatêk asayîş nîya. Tu heqê kesêk çin o ke tersêko winasî bikerê zerreyê cinîyan.”