Mêrdîn de krîzê ekonomî ra esnafî dikanê xo padanê! 

2020-10-15 15:49:43


	 

	MÊRDÎN - Pandemî û krîzê ekonomî tesîrê xo şaristanê tarîxî ke yew merkezê turîzmî yo kerd. Esnafê bi nameyê Bêrîtan Tanişman û Mizgîn Sirnaç derheqê krîzî de qisey kerdî û vatî: “Êdî Mêrdîn seke verê çalak nîyo û no zî beno sebeb ke qezencê ma kêm bibo. Yan zî xeylê esnafî seba nê mecbûr manenê ke dikananê xo padê.”

	 

	Şaristanê Mêrdînî bi mîmarîyê xo sey muzeyêk ser akerde yo. Coka merkezê turîzmî yê tewr girîng o. Bêguman turîzmo ke dermanê ekonomîya şaristanî bi, emsar sewîyeya tewr cêr de yo. Krîz, verê pandemî tesîrêk pîl serê esnafan de kerd û pandemî zî no krîz pîlêr kerd. Esnafê ke seba krîzê ekonomî bi zor serê lingan de mendêne, seba kêmbîyayîşê ameyîş û şîyayîşî prosesê pandemî de yew bi yew derabeyê dikananê xo padanê. Esnafê ke wareyê tewr çalak ê Mêrdînî de yê xemgînîyê xo ardî ziwan û vatî ke rewşa înan ê ekonomî tehluke de ya.

	 

	‘Ganî hukmat hetê ekonomî de game bierzo’

	 

	Wendekara unîversîte Mizgîn Sirnaç, eynî wextî de sûka Mêrdîno kan de rotişê cil û belgan kena. Mizgîne bale ante serê rewşa ekonomî û wina va: “Verê pandemî krîzê ekonomî bi û ma reyna prosesêk zor ciwîyayî. Tewr kêm bi zor ma peynîya menge ardêne. Labelê ewro pandemî û krîzê ekonomî qat bi qat tesîr serê ma de keno. Dest ardişê peynîya menge vera bidê, ma nêeşkenê îdareyê xo yê rojane zî bikerê. Êdî turîstî çin ê. No zî serê debara ma de rewşêka negatîf virazneno. Semdo ke komel zî qezenc nêkeno, nêeşkeno dayîş û girewtiş zî bikero. Hukmat eşkeno na babete de gamê tewr girîng bierzo. Bi taybetî zî eşkenê seba esnafan zî paketan eşkera bikero la nêkeno û rewşa xira bena.”

	 

	‘Heqdestê mi rojêk zî qîmê mi nêkeno’

	 

	Berîtan Tanişman ke beşê hunera weşik ê unîversîta qedênaya seba ke bêkar menda, aye zî karê rotişî kena û Berîtane derheqê krîzî de wina va: “Yeno zanayene ke seba pandemî dersî serê onlîne de ameyîne dayene. La seba ke înternetê ma çin bi, mi bi dereceyêk kêm beşê xo qedêna. Lazim bi ez beşê xo de bixebityî û mamosteyîya resimî bikerî la seba krîzî ez nika karêk bîn de xebityena. Mi no kar zî xêrê embazêk xo peyda kerd. Hetêk ra rotişê çenteyan kena hetêk ra zî şûşan boyax kena, goşera, bazin, gerdanî viraznena û roşena. La keda destê mi ke gêna rojêk zî qîmê mi nêkeno.”

	 

	‘Ma nêeşkenê peynîya menge bîyarê’

	 

	Berîtane tewr peyîn wina: “Ameyîş û şîyayîşê turîstan bi sereyê xo kêm bi, la werte de krîzêk pîl ê ekonomî esto ke no zî tesîr serê komel û esnafan keno. Roje ma bi zor perçeyêk roşenê yan ney. Na rey zî seba ke rotiş nêkena, nêeşkena debara xo zî bikerê. No proses bi her hawayî tesîrê xo negatîf serê ma de keno. Ez nêeşkena peynîya menge bîyara. Ez nê rengî hewil dana ke debara xo kena. Labelê nêeşkena pereyê awe xo bidî. Wina dewam bikero ma do nêxebityî. La ma hewl danê ke her tewir serê lingan de bimanê.”