‘Ma do heta peynî taqîbkerdoxê dewaya Îpeke bê’ 2020-10-14 15:15:11   Safiye Alagaş   ÊLIH - Cinîyê Êlihijî seba dewaya çawîşê pispor Musa Orhan ke tecawuzê Îpek Er kerd û bi sebebê merdişê aye, ci rê amebî akerdene de veng dayî. Cinîyan vatî, na dewa seba cinîyan zaf girîng a û ê do heta peynî taqîbkerdoxê dewa bê.   Qezaya Qûbînî ya Êlihî de, cinîya 18 serrî Îpek Era ke rastê tecawuzê Çawişê Pispor Mûsa Orhanî ameye, 16ê temmuze de seba ke tecawuzo ke ci rê ame kerdene hewl da xo bikişo. Îpeke ke bi birîndarî berdî nêweşxane, 18ê Tebaxe de dinyaya xo bedilnaye. Versûc Musa Orhano ke vernê de nêame tepiştene, dima ra serê reaksîyonê raya pêroyî de ame tepiştene. La 2yîn Dadgeha Cezaya Giran ya Sêrtî, qerarê dadgeha 1in red kerdib û versûc Musa Orhan, 25ê Temmuze de amebi tehliyekerdene. Roniştişê yewin ê dewaya ke Musa Orhan ci ra yeno muhakemekerdene do 16ê teşrîna verêne de 1in Dadgeha Cezaya giran ya Sêrtî de bêro vînayene. Cinîyê Êlîhî seba wayîrvejîyayîşê dewaya Îpek Er vengdayîşê wayîrvejîyayîşî kerdî.   ‘Ma do nê polîtîkayê lêşinan veng vejê’   Gulnur Delî ke îdarekarê şaristanê Êlîhî ya HDPyî de ca gêna, dîyar kerd ke polîtîkayê taybet şexsê Îpeke Er de serê cinîyê kurdan de ame kerdene û va: “Serrê 90 de ke desteştiş û tecawuzê cinîyan ameyîne kerdene, nika zî eynî çî bi konseptêk cîya serê cinîyê kurdan de yeno kerdene. Bi no hawa bi taybetî Amed, Dêrsîm, Êlîh, Mêrdîn û xeylê cayê Kurdistanî de polîtîkayê şerê taybet ameyî kerdene. Bi metodê eşq û zewacî reyde nêzdîyê cinîyê kurdan kenê. Bi no hawa înan xapênenê û kenê torra xo. Ma zî sey cinîyê TJAyî û meclîsa Cinîyan ê HDPyî yê Êlîhî hemverê nê polîtîkayê taybet yê serê cinîyê kurdan de yenê kerdene. Ma veng danê heme cinîyê kurd û cinîyê Tirkan ke 16ê menge de seba wayîrvejîyayîşê dewaya Îpeke û cinîyê sey aye bêrê têhet û wayîrê dewa vejîyê.”   ‘Heta peynî ma do taqîbkerdoxê dewa bê’   Îdarekara HDPyî ya şaristanê Êlihî Ruken Işik zî wina va: “Îpeke wexto ke hema nêmerdebî va, ‘ez bêveng nêmenda la kesêk vengê mi nêeşnawit.’ La gama ke ma waşt nêweşxane û wextê gorewtişê cenaze de wayîrê ci vejîyê ma ameyî astnegkerdene û keye baro giran dir rî bi rî mend. Hedîseya Îpeke ma temamine xemgîn kerd. Maya Îpeke muracatê xeylê cayan da la tu kes wayîr nêvejîya. Maya Îpeke tewr peyîn vatib, ‘kam fek dewaya Îpeke ra vera bido zî ez vara nêdana. Semedo ke Îpekê bîn nêkewê na rewşe ez o wayîrê na dewa vejîyî.’ Ma zî sey cinîyê Êlîhî yê TJAyî paştdayîşê na dewa kenê. Hewl danê û coka waştî têkilîyê ma bi keyeyî dir qut bikerê. La hem keye bi taybetî zî maya Îpeke û hem zî ma seba ke dewamê na dewa bîyarê, çi destê ma ra bêro ma do bikerê. Ma do wayîrê dewaya Îpeke ke do 16ê menge de bêro vînayene vejê heta ke gumanbar ceza bigîro.”   ‘Ê se bikerê zî ma do peyser game nêerzê’   Aktîvîsta TJAyî Gurbet Dogan zî wina va: “Ma zanê ke dişmin wazeno îradeyê ma cinîyan bişkino. La ma bingeyê îradeyê xo xopawitiş ra gênê. Ganî cinîyê ciwanî bi fikr û îradeyê xo hemverê nê polîtîkayan vejîyê. Ê se bikerê zî ma do peyser game nêerzê û ma do hemverê nê polîtîkayê lêşinan vindertişêk xurt ramojnê. Ma sey  TJA, Meclîsê Cinîyan ê HDPyî wayîrê dewaya Îpeke vejîyê. Ma vanê ke keyeyê Îpeke tena nîyo.”   ‘Wayşrvejîyayîşê dewa wezîfeyê her kesî yo’    Endama Meclîsê Şaredarîye Şukran Çelebî zî dîyar kerd ke wayîrvejîyayîşê dewaya Îpeke Er wezîfeyê heme kesê ke hemverê şîdet, desteştiş û tecawuzî vejîyê û wina va: “Şexsê Îpek Er de waştî ke cinîyê kurdan bêrûmet bikerê. Ma nê helwestî tesdîq nêkenê û bi rêxistinbîyayîşê cinîyan ma do nê polîtikayê lêşinan biqedênê. Ma veng danê heme cinîyan û şarî wayîrê dewaya Îpeke vejîyê. Na dewa eynî wextî de dewaya cinîyê ke seba şîdet, desteştiş û tecawuzî ra ameyê qetilkerdene ya.”