Cinîyê Şirnexijî: Şêrê verê keyberê edlîye de edalet biwazê 2020-10-14 12:38:59   Rojda Aydin    ŞIRNEX - Cinîyê Şirnexijî, dîyar kerdî ke îqtîdarê AKPyî dimayê  Amedî nika verê xo dayo Şirnex û bi destê mayan wazeno ke xoverdayîşê şarî vinî bikerê û va: “Ganî cinî û mayî hemverê polîtîkayê wina de aya bê û nêrê kayan. Vera ke verê keyberê HDPyî de ronişnenê, wa şêrê verê keyberê edlîye de roşê û edalet biwazê.”   Polîtîkayê şerê taybet her wext bi metodê cîya herême de gane bi. Goreyê her şaristanê kurdan polîtîkayêk yeno kerdene. Bi taybetî zî Şirnex de her tewir şer yeno kerdene. Serrê 90 de Şirnex de hêzê sîya zêde bî û hetê psîkolojîk û fîzîkî de şerêk ame kerdene. Welatî hemverê hêrişan xoverdayîş aver berdîbî. Îqtîdarê AKPyî seke Amedî nika zî wazeno Şirnex de zî çalakîya roniştişê mayan a verê awanîya Partîya Demokratîke ya Şaran (HDP) bikera. Cinîyê Şirnexijî reaksîyon verê çalakî dayî û vatî tu wext xoverdayîşê herême hezm nêkerdî û muracatê nê reyîran kenê.   ‘Cizîr keleya xoverdayîşî ya’   Wetha Kolanç, dîyar kerd ke îqtîdarê AKPyî hewl dano ke keyeyê herême bixapîno û wina va: "AKP bi hîsê cinîyan kay keno. Botan şaristanêko xoverdayîş û serewedaritişî yo. Şarê ma yê Botanî bi serran hemverê zulmî û hêrişan xo ver dano. Cizîra Botan keleya xoverdayîş a. Dewlete ewro nê cinîyan kena dişminê kurdan û HDPyî. Dewlete nêwazena ke kurdî sere wedarnê û azad biciwîyê. Semedê nê, nê çîyan kena. Dewlete nêeşkena kurdan vindarna û nika zî bi nê metodan hêrişê şarî kena. Ma sey mayî bi xoverdayîş û vindertişê xo hemverê nê zulmî micadele bikerê. Ganî ma dişminî qebul nêkerê.”   ‘Wa şêrê verê keyberê edlîye de edalet biwazê’   Necat Kuçuk, wextê qedexeyê Cizîrî de di domanê xo vinî kerda. Necate derheqê babete de wina va: “Dewlete bi xeylê tewirê cîya cinî û domanan xapênena. Nika verê berê awanîya  HDPyî de çalakîyêke ameya destpêkerdene. Ez zaf matmayî menda, nê cinî senîn yenê verê awanî de ronişnenê. Ganî nê cinî şêrê verê keyberê edlîye û uca de edalet biwazê. Çîyo ke yeno kerdene, nîno qebuşkerdene û ma şermezar kenê. Kesê ke şênê verê berê HDPyî sloganan erzenê û bi xo Kurd ê. Hîn keyeyî zî keyeyê şehîdan ê û senîn çîyêk winasî kenê. Wa seba gonî û xatirê domananê xo fek nê şaşî ra vera bidê. Dewlete bi taybetî polîtîkayêk wina hemverê kurdan kena. Wazena Kurdan bikera dişminê yewbînan.”   ‘Kesê ke benê hemrayê dewlete xîyanetê herre kenê’   Necate dîyar kerd ke Amed de zî mayî verê awanîya HDPyî de serrêk zêdeyêr roniştî û wina va: "Mayî bi serrêk ra zêdeyêr verê berê awanîya HDPyî ya Amedî de çadire dayê ro. O wext polîsan ma ra zî va, 'Domanê şima vindîbîyayeyê bêrê ma şima zî berê Amed'. La ma çîyêk winasî qebul nêkerd. Eke ewro domanê ma şîyê tewrê PKK bîyê, sebebê ci AKP yo. Semedo ke îqtîdarî domanê ma kiştî, veşnayî. Nika zî serê domananê ma de zulm û zordarî esto. Heta ke ma saxbê ma do pey doman, serek û şehîdê xo bê. Tu hêriş û zulm nêeşkeno ma bido vindarnayîş. Ma do pey dewaya înan de bê. Dewlete bi taybetî Botanî hedef girewta. Semedo ke serrê 90 ra heta ewro şarê Kurdî her wext hemverê zulm, kiştiş û tedayan xo ver da û tu wext sere nêtewêna. Dewlete qetî nêresa amancê xo. Seba nê ewro no polîtîkayê lêşin kenê.”   Meyerê kayê dewlete’    Sabîha Altûrk, qiseykerdişê xo de bale ante serê polîtîkayê şer yê taybet herême de yenê kerdene û va: "AKP herêma Botanî şerê taybet yeno kerdene. Bi taybetî zî kayê lêşin hemverê cinîyan yenê kerdene. Bi hawayêk cîya cinîyê ciwanan xapênenê û kenê qurbanê polîtîkayanê xo. Ez veng dana her kesî ke nêrê kayê dewlete. Wa şaşîyan ra ageyrê û nêkewê kêmîyan. Seba ke şarê Kurdî heta ewro serê netêwenenê înam rê bi kûl.”