‘Ma nêwazenê zimistanî teber de bimanê’ 2020-10-13 14:12:14   WAN - Welatîyê taxa Elbakî ke erdlerz ra keyeyê înan rijîyayî, vatî ke ê zimistanêk bîn zî nêwazenê teber de derbaz bikerê.   Şaristanê Xoyî ke mîyanê sînorê Îrane de yo 28ê sibate de erdlerzêk 5.9 ame meydan. Netîceyê erdlerzî de taxê girêdayê Elbakê, Elbîs, Elezî, Qiratî, Qşkol, Xanik û Gulikî de xeylê awanî rijyabî. Erdlerz ra qeza de 11 kesî dinyaya xo bedilna, xeylê heywanî zî binê xirbe de mendî û merdar bî. Hîn heywanê ke welatîyê qeza bi îmkananê xo xelisyayî zî semedo ke cayê ke bimanê çin bi, xeylê heywanî merdar bîbî.   Hîn heywanî zî semedo ke ca çinbi ameyî rotene   Herêma ke serd bi taybetî şewe tesîr keno û binê sifirî derbaz keno, xeylê kesî yan verê nê serdî de dorê adirê ke fînayê ta derbaz kerdî yan zî kaseyê ke kamyon û traktoran de derbaz kerdî. Welatîyê ke bi hewtan semedê stargehî veng dayî, tena şorba ame vilakerdene û xeylê welatîyê taxe zî seba ke cayêk ê û heywanê xo pê star bibê nêvînayî û cayê xo terk kerdî. Kesê ke herêma erdlerzî de mendî zî bi hetkarîya ke herêmê cîya ra ame serê lingan de mendî.   ‘Ma problemê starbîyayîşî ciwîyenê’    Taxa gulik ke şar erdlerz, laser zî wişt welatîyê taxe ra Çîçek Akdemîr va ke hawa nika ra bîyo serd û dîyar kerd ke ê nêeşkenê seba xo kolî û komir bigîrê û va: "Ma problemê starbîyayîşî ciwîyenê. Domananê mi rê cilî lazim ê, cayêk ke heywanê xo ma ca bidê ci çin o. Çele nêzdî beno û ma nêzanê se bikerî.”   ‘Konteynirêk di oda de ma 12 kesî manenê’   Bukê Aydemîr zî dîyar kerd ke selahîyetdarê AFADî, rojê ewil de xeylê ameyê taxa înan û wina vat: “Wexto ke selahîyetdarî ameyî sozê ke do semedê keyeyan viraznê dayî û vatî ê do reyke bîn bêrê serdayîşê ma û xeylê soz dayî ma. La sozê xo bi ca nêardî. Ma konteynirêk di oda de 10-12 kesî manenê û ma problemê awe cereyanî ciwîyenê. Ma nêzanê ma do zimistan senîn derbaz bikerê. Domanê ma serdan ra nêweş kewenê”   Faturayê cereyanî konteyniran 370 TL yo   Guler Bîrtane ke taxa Xanikî de manena zî vat, konteynir dayê înan la hacetê xo nêeşkenê înan bi ca bikerê û seba nê keyeyê ke erdlerz ra zirar dîyê de manenê û wina va: “Semedo ke bingeyê konteyniran nêameyo viraştene, ma nêeşkenê daşir û banyo bixebitnê. Tena faturayê cereyanî konteyinr de 370 TL ame. Fature zî ma danê. Ma tena waşt ke keyeyêk ma bieşkê bi rehetî bimanê. No zimistano diyîn o ke ma teber de derbaz bikerê û ti lazimîyê ma bi ca nêardî.”   Heywanî bê ca û war ameyî verdayene   Zeynep Guneş zî vat ke hukmatî lazimî bi ca nêardo û wina vat: “Heywanê ma hamnanî de zozanan de bî û problemê înan ê cayî çinbi la bi ameyîşî zimistanî reyde ganî ma înan bikerê axuran. La axur çin ê û ma nêzanê ke ça bi ca bikerê. Xêrcê pesdewarî ti ameyoxê ma çin o, wa keyeyê ma viraznê ma paştdayîş wazenê.”   Hinara ke konteynir nêdayê çadira ci zî veşaya   Hinar Kartal zî ard ziwan ke konteynir nêdayê tena çadirêk dayê ro û wina vat: “Çadira ma adir pê kewt û veşa. Ma mecbûrê ke keyeyê ke zirar dîyo de bimanê. Ti cayêk ma ci de bimanê çin o.” Sewbîna Îrane Bîrtane zî vat ke ê serd ra nêeşkenê konteyniran de rakoyê û wina vat: "Ez pîr a û nêweş a. Konteynir de manena, milê mi wişk bîyo û serd ra nêeşkena rakoyî. Ma hetkarî wazenê.”