Qerajê Koyê Cûdî û Gabarî de baxçeyê fistiqê ke binê erdî de yê 

2020-10-11 14:02:41


	 

	Rojda Aydin 

	 

	ŞIRNEX - Dewa Bedrû ya Silopî wextê arêdayîşê fistiqê ke binê erdî de yê dest pêkerd. Cinîyê ciwanî ke fistiqan kom kenê, dîyar kerdî ke serê sibayî heta şan de xebityenê û vatî: "Karêko zaf zehmet o û bi taybetî zî no kar serê milê cinîyan de yo. Labelê berardişê ke emsar vejîya meydan kêfê ma zaf weş kerd."

	 

	Qerajê Koyê Cûdî û Gabarî de baxçeyê fistiqê ke binê erdî de yê zaf ê. Silopîyê Şirnexî de berardişê fistiqan ke zêde bîyo, bi şaristanê Osmanîye kewto musabaqe. Berardişê ke zêde bîyê, kêfê dewijan zêde kerdo. Sewbîna berardiş de Şirnex, Tirkîya rêza 3in de ca gêno. Dewa Bedrû ya qezaya  Silopî zî wextê arêdayîşê fistiqê binê erdî de dest pêkerd. Bi taybetî tîya cinî xebityenê. Cinîyê ke tîya xebityenê, qalê berardiş û zehmetî ajansê ma rê kerd.

	 

	Ceylan Olgar, dîyar kerd ke menga nîsane de dest bi ramitişê fistiqan kerd û wina va: "Dimayê 3 û 4 mengî bîn ma yenê awedayene. Heta menga teşrîna verêne ma yenê xizmetê ci kenê. Ma bi destê xo fistiqan arêdanê û bi destê xo vaş û kerrayê ke mîyanê erdî de yê arêdanê. Ma menga teşrîna verêne de dest bi arêdayîşê fistiqan kenê. Sere de bi makîneyan yenê fistiqan wedarnenê û dima ra ma cinî kewenê mîyanê zîyanê fistiqan. Ma dima ra yew bi yew fistiqan kom kenê. Seba ke ma fistiqan bi destê xo arêdanê zaf zehmet yeno. Ma zaf rincan benê. Wexto ke ma fistiqan arêdanê serê giştî ma pêro teqenê. Binê tîjî de sereyê ma dejeno. Ma serê sibayî saete 6 de dest bi kar kenê, heta saete 7ê şan de xebityenê. Wexto ke saete bena 11 ma şinê keye werd wenê û reyke bîn zî yenê. Ma zêde nêeşkenê boya xo bidê. Seba ke ma zêde xebityenê, ma êdî nêeşkenê serê lingan de vinderê. Ma çuwalan anê û fistiqan kenê ci."

	 

	'Fistiqî emsar zaf zêde yê'

	 

	Ceylane ard ziwan ke goreyê par ra fistiqê înan hîna bîyê zêde û va: "Fistiqê ma emsar zaf zêde bîyê. Nê fistiqê ke ma arêdanê, erşawenê fabrîqa. Dima ra zî benê Osmanîye roşenê. Ma nika Tirkîya de rêza hîrêne de yê. Tîya xeylê cinî xebityenê. Her cinîyêk xetêk de xebityena ke lez xelas bo. Tonê fistiqan emsar bîyo 13 mîlyar. Fistiqî zaf bîyê vay. Sewbîna fistiqê ke ma arêdanê keye de zî xebityenê."

	 

	'No zehmetî bi taybetî serê milê cinîyan de yo' 

	 

	Zehra Olgar, zî dîyar kerd ke kar û barê fistiqan zaf zehmet o û wina va: "Ma serê sibayî rew dest bi kar kenê û heta şan de xebityenê. Ma menga nîsane de dest bi karê fistiqan kenê, heta peynîya menga teşrîna verêne. Çîyo tewr zehmet zî bi destan vaşê ke mîyan de arêdayîşê ci yo. Seba germbîyayîşê menga hamnanî ma tewr zêde zehmetî ancenê. Germbîyayîş zêde zehmetî dano. Gama ke ma fistiqan kom kenê, libeke zî erd de nêmaneno. Karê fistiqan zehmet o û nêweş o. No zehmetî bi taybetî serê milê cinîyan de yo. Her roja ma mîyanê erdî de derbaz beno. Ez seba ke hetkarîya keyeyê xo bikerî xebityena."

	 

	'Şar eleqeyêk pîl fistiqan rê ramojneno'

	 

	Tewr peyîn Şêhnaz Olgar, qisey kerd û va: "Karê fistiqan raştî zî heme karê bîn zehmetêr o. Ma kerrayan û vaşan bi destê xo arêdanê. Seba ke makîne zirar nêvîno, ma kerrayan arêdanê. Ma tîya de nêzdîyê 10-12 kes ê. Serê sibayî ra heta şan de ma mîyanê erdan de yê. Emsar fistiqî zaf zêde yê. Ez seba hetkarîya keyeyê xo bikera, xebityena. Xora no erd zî erdê ma yo. Şar eleqeyêk pîl fistiqan rê ramojneno. Fistiqê ke ma arêdanê, ma cîrananê xo dir zî pare kenê û seba keyeyê xo zî ma arêdanê."