Polîsan hêrişê rayrayîşê keye û rêxistinê demokratîk yê Enqereyî kerdî 

2020-10-10 16:14:20


	 

	
		ENQERE - Polîsan hêrişê kesanê ke waştêne Meydanê Garî yê Enqere de qurbananê Qirkerdişê Garî yad bikerê û 11 kesî destbend kerdî.
	
		 
	
		Polîsan nêverda keyeyî Qirkerdişê Garî yê Enqere yad bikerê û ver bi cayê serebûtî Meydanê Garî  şorê. Keyeyê qurbanan, wekîkê HDPyî Kemal Bulbul û Mehmet Ruştu Tiryakî zî tede hemwelatîyî wexto ke metro ra vejîyayî hetê polîsan ra ameyî astengkerdene. Polîsan bi bahaneya Korona destûr nêda yadkerdişî.
	
		 
	
		Nîqaşan ra dima polîsan hêrişê girseyî kerd û 11 kesî destbend kerdî.
	
		 
	
		Hêrişê polîsan ra dima keye û rêxistinî noqtayêka bîne de kom bîyî la polîsan reyna destûr nêda înan. Polîsan anons kerd ke wa keyeyî vila bibê.
	
		 
	
		Girseyî pê çepik û sloganan anonsê polîsan protesto kerdî û bi sloganê 'Dewleta kiştoxe do hesab bida' û '10ê Teşrîna Verêne xo vîrî ra mekerê, meverdê bêro vîrkerdene' trafîk girewt. Girseyî polîsî protesto kerdî.