'Azadîya Abdullah Ocalanî do aştîye zî bîyara' 

2020-10-09 14:20:04


	 

	Gulîstan Azak

	 

	STENBOL - Dayîkê Aştîye yê Stenbolî 22in serrgera Komployê Mîyanneteweyî yê hemverê Rayberê PKKyî Abdullah Ocalan şermezar kerdî û vatî: "Ma Dayîkê Aştîye her wext waştişê azadîya Abdullah Ocalanî bikerê. Seba ke azadîya ey do aştîye bîyara."

	 

	Ewro 22yîn serrgera destpêkê Komployê Mîyanneteweyî yê hemverê Rayberê PKKyî Abdullah Ocalanî yo. 9ê teşrîna verêne de Abdullah Ocalan, Sûrîye ra ame vetene û dima ra zî prosesêk newe dest pêkerd. No proses bi rengê cîya yê komployî 22 serrî dewam keno. Dayîkê Aştîye yê Stenbolî serrgera komployî şermezar kerdî û fikrê xo bi ajansê ma dir pare kerdî."

	 

	'Fikrê ey tesîrê hîsanê mi kerd'

	 

	Dayîkê Aştîye ra Bedîha Gozgur, dimayê 12ê êlule seba teda û şîdetî Amed ra verê xo da Stenbol. Bedîha wina qalê prosesê ardişê Abdullah Ocalanî yê Tirkîya kerd: "Demo ke mi zanayîşê ardişê Abdullah Ocalan ê Tirkîy aeşnawit, mi o wext hîs kerd ke ma bê herrî mendî. Bi xeyrê fikr û fehmê Abdullah Ocalanî ma wayîrê vîr û baweîye yê. La qetî komployê bi nê rengî nêeşkenê fikr û fehmê hende pîl werte ra wedarnê. Bi taybetî ez bi felsefeyê ey azad bîya. Verê ma ra vatêne, 'ti cinî ya û keye de roşe.' Ma nêşî mektebe zî. Tena camêrdan erşawitine mektebe. Mi Abdullah Ocalan nêdîyo la fikrê û fehmê ey tesîr serê mi de kerd. Kêna mi zî pey fikrê azadî beşdarê PKKyî bî. Dewlete tecrîd bi her tewir dewam kena, semedo ke nêwazena fikrê ey vila bê. Abdullah Ocalan, eşkeno mîyanê hewteyêk de şero bîyaye peynî bikero, la dewlete qetî rayîrê çareserî nêecibnena."

	 

	'Ganî Abdullah Ocalan azad bibo'  

	 

	Nacîye Şahîn zî mîyanê xebatanê Dayîkê Aştîye yê Stenbolî de ca gêna û qiseykerdişê xo de wina bale ant: "Eke ewro Abdullah Ocalan azad bibayîne, nika werte de şer çinbi. Pêro dinya û Tirkîya zana ke Abdullah Ocalan kilîtê aştîye yo. Eke goşdarîyê ey nêkerê do şer û pêrodayîşî dewam bikerê. Merdiş, kiştiş û dej do her wext dewam bikerê. Abdullah Ocalan îradeyê xeylê kesan o. Nika îradeyê xeylê kesan mîyanê tecrîdî de yo. Ganî cade tecrîd bêro wedaritene û azadîye ci bêro dayene."

	 

	'Ma do seba azadîya Ocalan wareyan de bê'

	 

	Dayîka Aştîye ya Stenbolî Cemîle Çîftçî, destpêkê qiseykerdişê xo de reaksîyon vera komployê mîyanneteweyî da û wina vat: "Abdullah Ocalan, bi fikr û fehmê xo rayîrêk ramojneno. Serê herra ke bindest kerdî, bibi umîdêk. Bi hemkarîya dewletan plansazîyê şerî ame kerdene. Ma sey cinî, semedê azadîya ey wareyan de mîyanê çalakîyan de yê. Ma her roje seba azadîya ey biqîrê. Semedo ke fikr û fehmê ey semedê azadîya cinîyan zaf girîng bi. Bi xeyrê fikrê ey ma heqîqet dî. Ma zanê ke tena Abdullah Ocalan eşkeno aştîye bîyaro welat."