Cinîyê Êzidîjî: Xebate şerm nîya 2020-10-07 15:35:39   Nesrîn Hisen - Almaz Nayîf   ŞENGAL - Nure Hecî bi deştişê cilan 15 serrî debara keyeyê xo kena. Nura, dîyar kerd ke verê karkerdişê cinîyan mîyanê komelî de şerm ameyîne vînayene, labelê dimayê xelisnayîşê Şengalî yê DAÎŞî ra xeylê cinî seba debara keyeyê xo xebityenê.   Şengalî xeylê keyeyî bi ramitişî reyde debara xo kenê. La dimayê fermanê serra 2014 de ekonomîya xeylê keyeyan xira bi. La dimayê xelisyayîşî nika yew bi yew birînê Şengalî yenê pîştene. Pêwa fermanî vîrûsê koronayî zî tesîrêk negatîf serê ekonomî de kerd. Xeylê kesî goreyê îmkanê bîyaye debara keyeyê xo kenê. Înan ra yew zî Nura Hecî ya. Nura dewa Zorova ya Şengalî de ciwîyena û 15 serrî yo karê deştişî kena û pê debara xo kena. Nura, pêwa heme zehmetîyan wazena ke cinî bixebotyo û serê lingane xo de vindero.   ‘Verê karkerdişê cinîyan şerm ameyîne vînayene’   Nura, dîyar kerd ke wexto ke merdim kar bikero, tesîrêk pozîtîf serê psîkolojîyê merdimî zî keno û vat: “Verê fermanî nêverdayîne cinî kar bikerê. Şerm ameyîne vînayene. La verê fermanî zî mi nê karî kerdêne. Karkerdiş çîyêk şerm nîyo. Verê fermanî û dimayê fermanî xeylê cîyayî estê. Nika cinî sey verê aver şîya û eşkena her ware de bixebitya. Demê verê zî û nika zî ez keye de karê xo kena. Zehmet o la ez pê kêfweş a. 5 domanê mi estê û seba lazimîyê înan bi ca bîyarî kar kena. Ez cilê domanan, cilê pîlan û sewbîna cilê leşkerî derzena.”   ‘Ez cilan derzena’   Nura, qiseykerdişê xo de bale ante serê karî û wina va: "Çîyê ke mi rê lazim ê ez qezaya Sinûnê ya Şengalî ra ana. Ez goreyê îmkananê xo kar kena û heta nika kesêk hetkarîyêk nêda mi. Seba ke ez xeylêk hes karê xo ra kena û zehmetî hemverê karê mi nêbeno asteng. Xeylê rey başûrê Kurdistanî ra zî kesî yenê tîya û cilan danê deştiş.”   ‘Ganî her cinî karêk bikero’    Nura, hem karê xo û hem karê keyeyî rê eleqedar bena wina va: "Bi 15 serrî yo ez hem karê xo yê deştiş û hem zî karê xo yê keyeyî kena. Ez seba domananê xo kar kena. Ez werd amade kena, pakitî kena û deştiş kena. Vera ke keye de roşî no kar seba mi hîna baş o. Karkerdişê cinîyan şerm nîyo, nika xeylê cinî cayê karî akerdê, no zaf baş o. Goreyê verê tewr zêde cinî wareyê karî de ca gênê. Ez wazena ke heme cinîyê Êzidî karêk bikerê.”