Leyla Guven: Bi hemkarîya sazgehan micadeleyê xo girs bikerê 2020-10-06 15:07:48   Melîke Aydin   AYDIN - Hemsereka KCDyî Leyla Guven, tewrê xebatê kampanyaya TJAyî ya “Ma xo pawenê” ya herêma Egeyî bena, dîyar kerd ke bi hemkarîya pêro sazgehê cinîyan micadeleyê xo vejê sewîyeya tewr cor û vat: "Azadîya cinî azadîya komelî ya û coka ma amanc kenê ke zîhnîyetê camêrdan bivurnê.”   15ê êlule de hetê Tevgerê Cinîyê Azadan (TJA) Amedî startê kampanyaya çalakîyê ke 4 mengan bi sloganê, “Ma xo bipawê” amebi dayene. Dimayê start dayê her şaristanî de xebatê cîya ameyî destpêkerdene. Çarçewaya kampanya de herêma Egeyî zî xebatî yenê kerdene. Xebate bi hemkarîya sazgeh û dezgehê cinîyê yê Egeyî yena kerdene. Hemsereka Kongreya Komelî Demokratîke Leyla Guven çarçewaya kampanya de herêma Egeyî tewrê xebatan bî. Leyla, xebat û amancê kampanya ajansê ma rê ercna.   ‘Ma seba kampanya hemkarî bikerê’   Leyla, dîyar kerd ke Îzmîr, Aydin, Denîzlî û Dîdîmî de xebate kenê û wina vat: “Şaristanê Kurdistanî de xebatê kampanya yenê kerdene. Micadeleyêko ke ma danê micadeleyêk dem dergî yo. Polîtîkayê ke cinî çin hesibnayî 5 hezar serrî yo dewam keno. Sena nê peynî ardişê nê polîtîkayan rewêr nînê peynîkerdene. Ma seke TJAyî ma Kurdistan de xo bi rêxistin kenê labelê Tirkîya de zî ma mîyanê têkilîyan de yê. Senîn çalakî û reaksîyon de cinîyê Tirkîya dir hemverê munaqeşeyê  betalkerdişê Pêameyîşê Stenbolî de hemkarîyêk virazîya, do na kampanya de zî hemkarîyêk virazî yo.”   ‘Ma bêveng nêbenê’   Leyla, tewr peyîn wina vat: "Micadeleyê ma esasê xo de projeyê açernayîşê zîhniyetê camêrdan o. Heta ke cinî azad nêba, komel zî azad nêbeno. Eke cinî rind micadele nêkero komel zî bêmicadele bimano. Vurnayîşê embazê ma yê camêrdan yeno manaya demokratîkbîyayîşê keyeyî û cuya azad a têduşt. No çî bingeyêk o. Xeylê amancê kampanya ma esta. Ganî êdî tîya ra tepya tu camêrd nêeşko şîdet bikero. Kesê ke destê xo dergê ma kenê ke ma êdî qurban nîyê û ma bêveng nêbenê. Ma do micadeleyê xo vejê sewîyeya tewr corî yo.”