‘Gurbetellî Ersoz cinîyê rojnamegeran rê rayberî kerd’ 

2020-10-05 12:49:35


	 

	Gulîstan Azak

	 

	STENBOL - Gurbetellî Ersoz, bi qelema xo ya bi hêz û cesaretê xo, tena cinîyê kurdan ê rojnamegeran rê ney, pêroyê cinîyê dinya ke pey heqîqetî yê rayberî kerd. Sevda Kilinç va, ê wayîrê mîrasê Gurbetellîye ke înan rê verdayo vejênê û Melîs Alphan zî dîyar kerd ke ê têkoşîn û îradeyê cinîyê rojnameger ê Kurdan girîng vînenê.

	 

	7ê Teşrîna Verêne Îdarekara Pêroyî ya Weşanê Rojnameyê Ozgur Gundemî Gurbetellî Ersoz dinyaya xo bedilnaye serra 2013 ra tepya seke Roja Rojnamegerê Cinîyê Kurdan ame îlankerdene. Gurbetellîya ke dinyaya xo bedilna, bi qelema xo ya bi hêz tena cinîyê kurdan rê ney, pêro cinîyê rojnameger yê dinya rê bi zanayîşê xo rayberî kerd.

	 

	Cinîyê Rojnamegerî hîs û fikrê xo derheqê Roja rojnamgerê Cinîyê Kurdan ma dir pare kerdî.

	 

	‘Seba cinîyan rojnamegerî...’ 

	 

	Sevda Erkiliç ke Rojnameyê Ozgur Gelecekî de rojnamegerî kena, destpêkê qiseykerdişê xo de Roja Rojnamgerê cinîyê jin ên Kurdan pîroz kerd û va: “Welat de demo ke merdim rojnamgerîyêk muxalîf bikero û merdim sosyalîst bo zahmet o, la seba cinîyan na rewşe hîna zehmet bena. Seba ke ma cografyayêke wareyê rojnamegerî destê camêrdan de yo ciwîyenê. Na herême de hîna zehmet a. Semedo ke ti her xeberêk ke ti viraznena ti eşkena bêrê tepiştene û gama ke ti bibê mudurê pêroyî yê weşanî zî eşkenê to bi serran zîndan de verdê. Tirkîya de şîdetêk pîl esto.”

	 

	‘Ma wayîrê nê mîrasî vejênê’ 

	 

	Sevda va ke gama ê serran ê 90yî û rojnamegerîya Gurbetelliye ana vîrê xo bi kelecan bena û wina va: “Xoverdayîşê Gurbetellî seba ma girîng o. Ma cinîyê sosyalîst zaf çî musayî. Têkoşînê cinîyê kurdan ê rojnamegerî zî hêzê xo têkoşînê Gurbetellîye ra gênê. Ez sey cinîyêka Kurd û rojnamegere heta peynî wayîrê nê têkoşînî vejîyî. Ma vînenê ke rojnameyan û ajansan de cinî xeylê zêde yê. Cinîyê rojnamegerî hemverê vejîyayîşê tedayan bi israr ê û fek têkoşînê xo ra vera nêdanê. Pêwa destbendkerdene û tepiştene zî cinîyê rojnamegerî fek têkoşînê xo ra vera nêdanê.”

	 

	‘Ez têkoşînê meslegdaranê xo girîng vînena’

	 

	Rojnameger Melîse Alphan zî va, "Tirkîya de şîdetêk pîl serê çapemenî de esyo. Kesê ku wazenê rojnamegerîyêk rast bikerê her roj yenê destbendkerdene, yenê tepiştene û rastê şîdetî yenê. Gama ke nê rojnamegerî kurd bê û cinî bê nê tedayî qat bi qat zêde benê. Xora Tirkîya de rojnamegerî zehmet a, cinîbîyayîş zehmet a û gama ke merdim kurd bo û cîyabîyayîş hemverê merdimî bêro kerdene na rewşe tewr zêde zehmet kena. Seba nê ez têkoşînê cinîyê kurdan xeylê girîng vînena.”