'Di mengan de 13 cinî ameyî remnayene û 4 ameyî qetilkerdene' 

2020-10-03 15:28:31


	 

	Lîlav Elî

	 

	ŞEHBA - Endama Rêxistina Heqê Merdiman ê herêma Efrînî Heyhan Elî derheqê raporê di mengan de kerdişê û îhlalkerdişê dewleta tirkî yê serê cinîyan de dîyar kerd ke di mengan de  13 cinî ameyî remnayene û 4 ameyî qetilkerdene û wina vat: "kerdiş û îhlalkerdişê çeteyê girêdayê dewleta tirkî ya îşxalkerdox ke temamê sînorê huqûq û exlaqî derbaz kerd, dewam kenê. Efrîn de cinî mîyanê tarî de ciwîyenê."

	 

	Goreyê raporê Rêxistina Heqê Merdiman kerdiş û îhlalkerdişê serê cinîyan ê dewleta tirkî ya Efrînî dewam keno. Raporo tewr peyîn ke ame parekerdene menga tebaxe û êlûle de Efrîn de 13 cinî ameyî remnayene û 4 ameyî qetilkerdene. Endama Rêxistina Heqê Merdiman ê herêma Efrînî Heyhan Elî ajansê ma rê serê kerdişanê dewleta tirkî yê derheqê cinîyan de ercna.

	 

	'Efrîn de cinî tarî de ciwîyenê' 

	 

	Heyhane wina vat: "Kerdiş û îhlalkerdişê çeteyê girêdayê dewleta tirkî ke temamê sînorê huqûqî û exlaqî derbaz kerdê, verê çimê dinya de roj bi roj dewam kenê. Bi amancê vurnayîşê demografîk û bicakerdişê welatîyê xerîbî ke vera şarê efrînî de şexsê cinîyan de dewleta tirkî ya îşxalkerdoxe hewil dana ke amancê xo bi ca bîyara. Sewbîna ma zî sey Rêxistinê Heqê Merdiman ê herêma Efrînî wezîfeyê huqûqî û exlaqî yo ke kerdişê dewleta tirkî belge bikerê. Efrîn de cinî tarîtîyê zulmê çeteyê dewleta tirkî de ciwîyenê."

	 

	'Kerdişê derheqê cinîyê Efrînijan de sînorê merdimayî derbaz kerdo' 

	 

	Heyhane dewam de vat ke belgekerdişê kerdiş û îhlalkerdişê dewleta tirkî yê derheqê cinîyê Efrînijan de ard ziwan û wina vat: "Netîceyê têmîyanbîyayîşê ke bi îşxalkerdişê Efrînî dir rewşê negatîfî zaf yenê ciwîyene. Sewbîna goreyê belgekerdişê raporê her di mengê tebaxe û êlule 2020 de 13 cinî bi rayîrê komê çeteyê sey Sultan El Murad û Firqêt El Hemzetî ra ameyî remnayene, 4 cinî bi metodê xidar ameyî qetilkerdene, 2 cinî bi destê camêrdê ke zewicnayeyî bî, ameyî qetilkerdene û hûmarek cinî emrê xo yê qij de zî ameyê zewicnayene. Kerdişê ke şexsê cinîyê Efrînî de yeno kerdene de heme sînorê merdimayî rijna."

	 

	'Kîşte qetilkerdişê cinîyan de şîdetê fîzîkî û psîkolojîk'

	 

	Heyhane tewr peyîn dîyar kerd ke kîşte qetilkerdişî de şîdetê fîzîkî û psîkolojîk zî yeno kerdene û vat: "Keyeyê ke Efrîn de mendê seba tersê ke kêneyê înan do bikewê destê çeteyan, kênayê xo emrê qij de ke goreyê qanûnî qedexe yo zewicnenê. Zewaco ke bi zor yeno kerdene, netîceyê şîdetê fîzîkî û psîkolojîk xo dir ano. Pêwa eşkerayîya Neteweyê Yewbîyaye ke temamê kerdişê dewleta tirkî yê îşxalkerde belge keno, dewleta tirkî hêrişanê xo dewam kena. Sewbîna ma seke Rêxistinê Heqê Merdiman ê herêma Efrînî veng danê temamê Sazgeh û Rêxistinê pawitişê cinîyan kenê wayîrê cinîyanê Efrînî vejîyê û wezîfeyê xo yê huqûqî bi ca bîyarê.