Huda Kaya: Îqtîdar nêeşkeno xo bi nimaj xo xelas bikero 2020-10-03 14:42:09   STENBOL - Vervatoxa DÎKî Huda Kaya, reaksîyon vera qeyûmo ke tayînê Şaredarîya Qersî ame kerdene ramojna û verê şaredarîya nimajê îne kerd da û vat: "Bêedaletî kenê û ewnîyenê çimê şarî ra û zûran kenê. Îqtîdar îşkence merdimayî rê keno, nêeşkeno xo bi nimaj xelas bikero."   Endamê verê yê Heyetê Îdarekarê Merkezî (MYK) ê Partîya Demokratîke ya Şaran (HDP) û parlamenterê HDPyî verê deçarçewaya "Cipersayîşê Kobanî" de serê waştişê Serdozgerîya Komare ya Enqereyî de 25ê êlule de ameybî destbendkerdene. 20 sîyasetmedaran ra 17 sîyasetmedarî ameyî destbendkerdene. Dimayê ke Hemşaredarê Qersî ame tepiştene û  Wezaretê Karê Zereyî Ayhanî wezîfere girewt, vera ci Walîyê Qersî Turker Oksuz seke qeyûm tayînê şaredarî kerd. Walîyo ke bi artêşa pawitox û polîsan re derbazê awanîyê şaredarî bi, verê şaredarî de nimajê îne kerdib.   Vervatoxa Kongreya Îslamê Demokratîk (DÎK) û parlamentera Partîya Demokratîke ya Şaran (HDP) Huda Kaya, bi eşkerayîyêke nuşteyî reaksîyon hemverê nimajkerdişê qeyûmî ramojna. Huda wina vot: “Kesê ke bawerîya xo bi Homayî anê, serê rayîrê pêxember aver şinê, Qûranî seba xo kerdê rayber, pêro Musulmanî baş zanê ke dizdî, zûrî, îşkence û xespkerdiş sûc û guna yo. Yê ke îradeyê şarî xesp kenê û qeyûm tayîn kenê, bi kerdişê nimajêk merdiman bi Homayî xapênenê."   Huda dewam de wina vat: "Yê ke îrade û heqê însanan desteser kenê, do nêeşkê bikerdişê nimajî xo bidê efûkerdene. Yezîd û eskerê ci zî wextê Hz. Huseyîn qetil kerdî, nimaj kerdibî. Zalimê Haccac-i zî demo ke Kabe dano verê kerreyan, nimaj kerdêne. Kesê ke Ebû Hanîfe û Ahmet Bin Hanbel, zindan de îşkence kerdêne zî, nimaj kerdêne. La tarîx ewro lanet înan rê ano."   Huda, dîyar kerd ke dizdî kenê, bêedaletî kenê û ewnîyenê çimê şarî ra û zûran kenê. Huda vat, îqtîdar îşkence bi merdiman keno, nêeşkeno xo bi nimaj xelas bikero û wina qedêna: "Bi nimaj merdiman bi Homayî xapênenê. Bi no hawa zulm şarî rê kenê. La nimajo rast, estûne heqîq û edaletê dînî yo."