'Keda ke bi mengan danê veng şina' 

2020-10-02 15:14:06


	 

	RIHA - Hedla Ugur, Pirsûsê Rihayî de citkarî kena, krîzê ekonomî ra gerrekerdox a û vat: "Ma kedêke danê labelê ma heqdestê xo ra netîce nêgînê. Keda ke ma bi mengan danê veng şina."

	 

	Tesîrê krîzê ekonomî vernîya prosesê vîrusê koronayî zî serê komelî de bi tesîr bi. Dimayê destpêkerdişê prosesê, "normalbîyayîşî" zî serê krîzê ekonomîye kûr bi, welatîyê ke ramitiş dir eleqedar benê zî krîzê ekonomî reyde tesîr û gerrekerdox ê. Mewsîmê payîzî de tewr zêde sebze yenê rotene, citkarî nika seba berardişê xo biroşê xo rê ware geyrenê. Hedla Ugur (48) dewa Marutê Pirsûsê Rihayî de ciwîyena û debara xo bi citkarî kena.

	 

	Hedla menga adare de dest bi ramitişê sebzeyan kena û payîz zî roşena. Hedla zî sey bi desan citkarî bînan hetê rotişî de gerrekerdox a. HEdla wina qalê rewşa xo kerd: "Ez zaf tewirê sebze û fêkîyan ramnena. Seba ramitişî mi zaf deyn kerd. La netîce goreyê zerrîya mi nêbi. Seba ke ez deynê xo bidî, gerek berardişê xo biroşî. Mi 20 serrî ramitiş nêkerd la emsar mi qerar da ez ramitiş bikerî. Çi heyf, pêro berardişê mi destê mi de mendî."

	 

	Hedla, dîyar kerd ke dimayê bi serran ramitiş kerda û vat: "Bala mi ramitişî, domanîye ra dest pêkerd. Dimayê bi serran ma verê xo da dewe û ma tîya ramitiş kenê. Labelê seba ke beramberê keda xo ez çîyêk nêgîna, no çî mi xemgîn keno. Çareserî senîn bo ez nêzana. Tena ez ney, tîy axeylê citkarî eynî rewşe ciwîyenê. Rewşa welatê ma senîn do bo dîyar nîyo. Êdî welatî nêeşkenê debara keyeyê xo bikerê. Mewsîmî vuryayî la ma hema zî mîyanê zîyanî de yê."

	 

	Hedla, qiseykerdişê xo de bale ante serê prosesê pandemî û wina vat: "Bi pandemî dir krîzê ekonomî hîna kûr bi û no zî tesîr serê ma de kerd. Ma nika nêeşkenê berardişê xo biroşê. Ma firingî bi 25 qirûşî roşenê, la marketan bi 6 û 7 lîra yenê rotene. Welatî zî bi nê vayî nêeşkenê bigîrê. Seba ke ma nêeşkenê biroşê ma do belaş vila bikerê. Heta ke sîstem nêvuryo ma do wina biciwîyê."