Nergiz Ant: Hûmara cinîyê ke şîdet vînenê tewr zêde ya 

2020-10-02 14:51:19


	 

	Rojda Aydin

	 

	ŞIRNEX - Sereka Mudurîyê Polîtîkayê Cinîyan ê Şaredarîya Sîlopîyî Nergîze Ant, derheqê Merkezê Ercnayîşê Cinîyan ê  Dayîka Taybet ser o ercnayîş kerd. Nergize dîyar kerd ke komela seba paştdayîşê cinîyê ke şîdet înan rê yeno kerdene, ameyo akerdene û dewam de vat: "Heta nika hûmarêke kêm ê cinîyan seba şîdetî muracatê komele kerdê la ma zanê ke hûmara cinîyê ke şîdet înan rê yeno kerdene tewr zêde ya."

	 

	Taybet Înana 57 serrî 14ê Kanûna 2015 de wextê îlankerdişê îdarekarîyê xoser de ke qedexeyê tebervejîyayîşê kuçeyan amebi îlankerdene de qetil kerdî û 7 rojan cenazeye aye erd de mendebî. Şaredarîya Partîya Demokratîke ya Şaran (HDP) a Sîlopîyê Şirnexî seba nameyê Taybete bidê ciwîyayîş, Mudurîyê Polîtîkayê Cinîyan ê Şaredarîye taxa Cûdî de 10ê Temmuze de komeleya  bi nameyê Merkezê Ercnayîşê Cinîyan ê Dayîka Taybet akerd. Sereka Mudurîyê Polîtîkayê Cinîyan ê Şaredarîya Sîlopî Nergîz Ant, derheqê kar û xebatê komele de ercnayîş kerd.

	 

	Nergîze, sebebê akerdişê komeleya ard vîr û vat: "Şîdetê serê cinîyan pêro wareyê ciwîyayîşî de dewam de yo. “Şîdet serê cinîyan heme wareyê ciwîyayîş de dewam keno. Prosesê pandemî de zî şîdetê serê cinîyan kêm nêbê. Seba ke ma vernîya nê şîdetî bigîrê û xo biresnê cinîyê ma na komela akerd."

	 

	'Şîdet roj bi roje zêde beno'

	 

	Nergîze, dîyar kerd ke sey heme cayan herêma Botanî zî şîdetê serê cinîyan serê zêde bîyo û wina dewam kerd: “Botan de her kes yewbînan nas keno. Seba nê cinîyê ke şîdet înan rê yeno kerdene, nêeşkenê şêrê muracatê sazgehî bikerê. Seba nê zêde muracat nîno kerdene. La ma zanê ke hûmara cinîyê ke şîdet înan rê yeno kerdene tewr zêde ya. Akerdişê komeleya herême kêfweş kerd. Ma taxa Silopî de kombîyayîş serê şîdet û hêrişê cinî serê domanan de kenê û bi cinîyan dir têkîlîyê de bê."

	 

	'Wa cinî bêrê heqê xo bipawê' 

	 

	Nergîze tewr peyîn qiseykerdişê xo de wina vat: "Cinîyê ke muracatê komelî kenê, psîkolog û komelnasê ma hetkarîyê înan kenê. Hetê madî, manewî û huqûqî de çi lazim bo ê kenê. Ma tim hetkarîya cinîyan kenê û rayîr înan rê ramojnenê. Ma veng danê cinîyan ke vengê xo berz bikerê. Bêrê muracatê komele bikerê û ma hetkarîya înan bikerê. Wa seba pawitişê xo têkoşîn bikerê. Ganî ma hemverê şîdetî bêveng nêmanê."