Ayşe Acar Başaran: Ma do îqtîdarê camêrdan biqedênê 

2020-09-29 16:01:54


	 

	ENQERE - Vervatoxa Meclîsê Cinîyan ya HDPyî Ayşe Acar Başaran derherê operasyonê sîyasî de qisey kerde û va: “Hêriş vera îradeya cinîyan de yo. Heta ke ma îqtîdarê camêrdî bîyarê bin, ma do têkoşîn bikerê.”

	 

	Vervatoxa Meclîsê Cinîyan ya Partîya Demokratîke ya Şaran (HDP) Ayşe Acar Başaran endamanê Koordînasyonê Cinîyan û Gruba Cinîyan a Parlamento reyde bînaya merkezê pêroyî de derheqê operasyonanê sîyasîyî de eşkerayîyêke daye. Hemsereka Kongreya Komela Demokratîke (KCD) Leyla Guven, Hemvervatoxa Kongreya Demokratîke ya Şaran (HDK) Îdîle Ugurlu û Hemsereka Partîya Herêmê Demokratîkî (DBP) Salîha Aydenîz zî tewrê eşkerayîye bîyî.

	 

	‘Çalakîyê demokratîk bî’

	 

	Ayşe qiseykerdişê xo de wina va: “5 rojî verî semedê serebûtanê Kobanê ra ke 6 serrî verê cû qewimîyayî, 20 embazê ma ameyî destbendkerdene. O çax DAIŞî Kobanê de qirkerdiş kerdêne. Berpirsîyarê serebûtanê Kobanê îqtîdar o la ma ra hesab perseno. Îqtîdar ho qesasê Kobanê gêno. Nê operasyonê îqtîdarî yê vera HDPyî sîyasetê ci, dişmenîya ci ya vera cinîyan û xoza eşkera kenê. Îqtîdar bi nê operasyonan HDPyî ra qesasê weçînayê 7ê hezîrane, 1ê teşrîna peyêne û 31ê adare  gêno.”

	 

	‘Hêrişî vera îradeyê cinîyan o’

	 

	Ayşe dewam de va ke hêrişî hemverê kerdişanê cinîyan o û va: “Hêrişê vera HDPyî hêrişê vera îradeyê cinîyan o. Pêro cinîyî, hêzê demokratîkî destpêkê nê hêrişan ra nata bîyî vengê HDPyî. Çunke nê operasyonî vera ê cinîyan ameyî kerdene ke seba temsîlîya têdûşte, Peymana Îstanbulî, Rojawanî, hemserekîye têkoşîn kenê. Nê operasyonî seba cinîyan ê xoverdayoxan  mesajê 'Xo ver medê, têkoşîn mekerê' yo. Fîgene, Sebahate, Gultenî zîndanan de, cinîyê HDPyîjî meydanan de, Meclîs de, cinîyê femînîstî û kurdî her ca de têkoşîn û xoverdayîşê xo dewam kenê.”

	 

	‘Do îqtîdarê camêrdan vinî bikero’

	 

	Ayşe tewr peyîn wina va: “Ma heta ke şima îqtîdarî ra bîyarê bin do têkoşîn bikerê. Ê cinîyê ke paştî danê HDPyî, ma înan rê sipas kenê. No paştdayîş do polîtîkayanê dişmenîya cinîyan ê îqtîdarî, polîtîkayanê şerî çin bikero. Ganî ma nê paştdayîşî bikerê pîlêr. Ma vera sîyasetê parçekerdiş, cîyakerdiş û vilakerdişê nasnameyê cinîyan têkoşînê xo pîl bikerê.”