Dewaya Hêlîn Şen: Şîno ke nêqedêno û edaleto ke nîno bi ca 

2020-09-29 14:42:14


	 

	Safiye Alagaş

	 

	AMED - Helîn Şen, Sûr de 2015 de ameye qetilkerdene. Dayîka aye Nazmîye Şen, dîyar kerd ke roja kênaya aye merda, sîya girê dana û hacetê kênaya xo kerda qutîyêk. Nazmîye hemverê qerarê vindernayîşê muhakemeyê dadgehe zî reaksîyon ramojna.

	 

	Qezaya Sûrî ya Amedî de wextê qedexeyê tebervejîyayîşê kuçeyan de 12ê teşrîna verêne 2015 de Helîs Hasret Şen ke şîne nan girewtêne, guleyê ke wesayîtê zirxî yê Kobra ra ame eştene, ameye qetilkerdene. Dimayê hedîse derheqê gumanbar Abdullah E. de sûcê ‘bi sebebê kiştişî' dewa ameye akerdene. Dewa Yewin Dadgeha Cezaya Giran ya Amedî de ameye vînayene û roniştişê 4in de heyetî derheqê polîsê gumanbar Abdullah E. de qerarê vindernayîşê muhakemeyî da.

	 

	Şîno ke peynî nêbeno 

	 

	Dayîka Helîne, Nazmîye Şen, roja ke kênaya ci ameye kiştene, sîya dana xo ra û 5 serrî yo kiştişê aye ser o derbaz bîyo. Nazmîye dîyar kerd ke heta edalet bi ca nêro do sîya xo ra do. Nazmîye, çend tîşort, forma, çend toqe û hîn hacetê bîn yê kênaya ci mendê qutîyêk de nimnena û vat: "Çîyê ke kênaya mi rê mendê nê yê. Futbol ra fam nêkerdêne la Galatasaray ra hes kerdêne. Her wext forma ci dayîne xo ra."

	 

	'Hewl danê ke psîkolojîyê ma xira bikerê'

	 

	Nazmîye reaksîyon vera qerarê dadgehe da û dîyar kerd ke dewa 4 serrî dima ameya akerdene û vat: "Ma tu mana nêdanê vindernayîşê dewa. Ez şermezar kena. Hewl danê ke psîkolojîyê ma xira bikerê. La ma do qetî fek têkoşînê xo ra vera nêdê. Ma bi hewldayîşê pîlan na dewa akerdib."

	 

	Nazmîye wina dewam kerd: "Ma vatêne do prosesêk derg bo. La ma qerarêk wina nêpawitêne. Ma vatêne do bêro taloqkerdene. Helîne roşnîya çimê dayîk û pîyê xo bî. Domanêk bî. La gumanbar nika serê wezîfe de yo û cuya xo dewam keno. No çîyêk bêmerdimayî yo. Seba dayîkêk rewşêka zehmet o. Psîkolojîyê mi û domananê mi tesîr bi. Ma mecbûr mendî dermanan bixebitnê. Ez emelîyat bîya. Di serrî nêeşkayîne rayîra şêrî. Mêrdeyê mi dir nêweşîyê şekir û tansyonî vejîya. Ma qetî na rewşe nêmusayî. Heta ke ez biciwîyî zî ez o têkoşînê xo dewam bikera. Helîne ciwîyayîşî ra hes kerdêne. Her wext huyayîne. Kal û pîran ra hes kerdêne. Roşnîya çimanê mi bî."

	 

	'Seba ke nînê cezakerdene wina rehet kişenê'

	 

	Nazmîye tewr peyîn zî wina vat: "Pêwa pêro delîlan nêame cezakerdene. Seba nînê cezakerdene zî wina rehet kişenê. Eke ceza biameyîne dayene, wina çîyêk nêbîne. Wa peynîya polîtîkaya bêcezabîyayîşî bîyarê. Ez seba dewa vengdayîşê paştdayîşî kena. Bibê vengê Helîne. Ez seba kênaya xo edalet wazena."