'Problemê zîndanan êdî kronîk bîyê' 

2020-09-22 13:53:15


	 

	AMED - Endama Komîsyonê Zîndanê Şubeyê ÎHD yê Amedî avukat Gurbete Yavuz, derheqê îhlalkerdişê heqan yê zîndanê cinîyan ê Amedî de qisey kerde û vat, problemê zîndanan kronîk bîyê û do seba çareserîya probleman do bi dozgerê zîndanî, wekîlê serdozgerî dir pêvînayîş bikerê.

	 

	Îhlalkerdişê heqan yê hemverê hepsîyê sîyasî her ke şono zêde benê. Zîndanê Cinîyan ê Amedî zî îhlalkerdişî peynî nêbenê. Hepsîyê cinî teda û îşkence bi nameyê ke Şubeyê Komeleya Heqê Merdiman ê Amedî (ÎHD) rê erşawitî, qalî kerdî. Avûkatê ÎHDyî çîyê ke yenê ciwîyayîşî kerdî rapor. Endama Komîsyonê Zîndanî yê ÎHDyî avûkat Gurbet Yavuze derheqê rewşa zîndanan de ercnayîş kerd.

	 

	'Seba çareserkerdişê problemî ma do bibê hetkar'

	 

	Gurbete dîyar kerd ke demo peyîn de zîndanan ra xeylê mektubî yenê û vat: "Dimayê serdayîşê zîndanan ma rapor amade kerd. Pêwa problemê kronîkî, prosesê pandemî de hîn problemê bînî vejîyayî werte. Serrêke zêde yo kamera koxuşê înan de esta û hepsîyê cinî wina rehet nîyê. Ma bi keyeyan dir, mercîyê fermî dir pêvînayîş kerd labelê nêameyî çareserkerdene. Demêko nêzdî de ma do bi dozgerê zîndanan û wekîlê serdozgerî dir pêvînayîş bikerê. Seba çareserî ma do têkoşîn bikerê."

	 

	'Derheqê Kurdkî de problem estê' 

	 

	Gurbete wina dewam kerde: Yew nê caardişan ra zî cit kelepçe yo. No zî şertê pandemî de nîno qebulkerdene. Seba hepsîyê ke şonê nêweşxane, xora kelepçe yeno kerdene û nê dir zî leşkeran reyde kelepçe kenê. Benê di heb kelepçe. Heqê weşîye zî nêdanê. Ma do na babete de selahîyetdaran dir pêvînayîş bikerê. Problemo bîn zî astengîyê hemverê Kurdkî yê. Hepsî seba deyîranê Kurdkî vanê, rastê astengîyan yenê. No huqûqî nîyo. Hepsî seba nê rastê cezaya dîsîplînî yenê."

	 

	'Werd de muye û cam vejêno'

	 

	Gurbete tewr peyîn dîyar kerd ke hepsî rastê cigêrayîşê viranî yenê û vat: "Mumkin nîyo ma na rewşe qebul bikerê. Tu asayîşê nê çin o. Problemo bîn zî hîjyen o. Her wext maske nînê dayene. Hacetê pakitî nînê dayene. Pêwa nê werdî de problemê cidî yenê ciwîyayîş. Mîyanê înan de muye û cam vejêno. Hîn embazî vejeteryan ê û werdê goreyê înan nînê dayene."